Wora Blong Laef

“MO OLGETA evriwan we oli harem tok ya, oli mas talem olsem tu, se ‘Yu kam.’ Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.” (Revelesen 22:17) “Wora ya blong laef”​—i minim olgeta samting we God i givim tru long ransom sakrifaes blong Jisas Kraes blong sevem yumi. Yumi save kasem ol samting ya, mo oli fri nomo. !Hemia wan nambawan fasin ya blong God blong yumi blong givim wetem gladhat! Be, ?from wanem wora i pija blong ol samting ya?

Yes, prapa wora i mekem i isi long ol tri blong oli gru long graon, mo from samting ya ol man oli save laef. Sipos i no gat wora, olgeta laef plan, mo olgeta man oli no save stap laef. Mo tu, i gat 65% blong wora long bodi blong yu. Sam man we oli gat save long saed blong helt oli talem se blong bodi i stap olsem, hem i nidim 2.4 lita blong wora evri dei. Ol samting we oli stap wok long bodi blong yu​—stat long taem we bel blong yumi i stap tantanem kakae kasem taem we ol doti oli goaot long bodi​—yu nidim wora. Sipos yu no dring wora long wan wik, bambae yu ded ya.

I sem mak, “wora ya blong laef” i givhan long yumi blong stap laef long saed blong speret. Sipos yumi sakemaot wora ya blong laef, yumi no save kasem laef blong olwe long fyuja. (Jon 3:36) Sipos yumi akseptem wora ya, yumi save kasem laef we i no save finis. Yumi no sapraes we woman Sameria i glad blong lesin long tok blong Jisas taem hem i talem se: “Man we i dring wora ya we mi bambae mi givim long hem, bambae hem i no save tosta bakegen samtaem. Wora ya we mi bambae mi givim long hem i save kam olsem wan spring wora we i save ron oltaem insaed long hem, blong givim laef ya long hem we i no save finis.” (Jon 4:14) I gud yumi gat sem fasin we yumi wantem tumas blong tekem wota ya long laef we i fri nomo.

[Foto Credi Line blong pija long pej 32]

Garo Nalbandian