?Yu Bin Statem Wan Bigfala Faea Samtaem?
NO GAT, yu ansa. !Be yu wet! Ating yu statem finis. Lesin long tok blong disaepol Jemes se: “Tang blong yumi i wan smol samting nomo, be hem i save tok flas long plante bigbigfala samting. Yufala i traem tingbaot. Wan smol faea nomo, be i save bonem ol haos long wan bigfala velej we i finisim olgeta.”—Jemes 3:5.
!Tang i wan impoten samting blong toktok, be ol man oli bin yusum long wan fasin we i no stret! Ol man oli yusum tang blong gyaman mo mekem gyaman toktok blong spolem narafala man. Wetem tang blong olgeta, oli hareap blong tok agens long ol narafala, oli spolem gudnem blong olgeta, mo gyaman long olgeta. Sam rebel oli yusum tang blong olgeta blong pulum ol man oli faet agensem ol narafala. !Adolf Hitler i yusum tang blong hem blong mekem rere wan nesen blong faet—wan ‘bigfala faea’ stret!
Nating se olgeta we oli gat gudfala fasin, be oli save mekem ol smol ‘faea’. ?Yu bin talem wan samting mo biaen yu tingbaot se i no stret blong talem? Sipos i olsem, yu kasem save samting we Jemes i minim taem hem i talem se: “Be i no gat man samtaem we i save mekem tang blong hem i stap kwaet.”—Jemes 3:8.
Nating se i olsem, yumi save traem blong yusum tang blong yumi blong talem ol samting ya nomo we oli stret. Olsem man blong raetem ol sam, yumi save strong blong talem se: “Naoia mi mi mas lukaot gud blong no talem sam tok we i no stret.” (Ol Sam 39:1) Yumi save traem blong leftemap tingting blong ol narafala, bitim we yumi hareap blong toktok agens long olgeta. Yumi save tokbaot gudfala samting we ol man oli mekem bitim we yumi mekem gyaman toktok blong daonem olgeta. Yumi save talem ol trutok mo advaes bitim we yumi stap gyaman no yumi stap trikim man. Taem wan gudfala hat i pusum man, tang blong hem i save talem ol gudfala tok we oli save mekem man i haremgud. Jisas i yusum tang blong hem long wan nambawan rod blong tijim ol man long rod blong laef.
Tru ya, “ded mo laef tufala i stap long paoa blong tang.” (Proveb 18:21) ?Tang blong yu i stap karem ded no i givim laef? ?Hem i statem wan ‘bigfala faea’ no hem i stopem? Man blong raetem ol sam i prea long God se: “Bambae mi singsing blong tokbaot ol tok blong yu, from we olgeta tok we yu yu putum oli stret nomo.” (Ol Sam 119:172) Sipos yumi gat tingting olsem man blong raetem ol sam, bambae yumi tu yumi save yusum tang blong yumi blong mekem samting we i gud.
[Foto Credit Line blong pija long pej 32]
U.S. Forest Service photo