?Oli Tinghae Tumas Long Blad Transfyusen?

Naoia oli stap yusum blad transfyusen plante long ol sikman, ?be i gud olsem we oli bilif long hem? ?Wanem tingting blong yu?

Long The American Journal of Medicine (Febuwari 1993), Dokta Craig S. Kitchens i askem: “?Oli Tinghae Tumas Long Blad Transfyusen?” Hem i talem se ol dokta oli tingbaot moa sipos wan meresin i save mekem sik i kam gud bitim ol denja we oli save kamaot. ?Olsem wanem long ol transfyusen?

Kitchens i tingting bak long wanem we i jes kamaot blong pruvum plante denja we i joen wetem ol transfyusen, olsem hepataetas, bodi i no moa blokem ol sik, ol wanwan haf insaed long bodi oli no moa wokgud, mo samting we oli kolem graft-versus-host. Wan stadi we i tokbaot “wan bigfala namba blong ol trabol we i save kamaot” long blad transfyusen “i talem se evri blad transfyusen i karem 20% jans blong mekem trabol i kamaot long bodi, samtaem trabol i smol nomo be samtaem i save spolem helt blong man,” oli save ded from.

?Be, ol gudfala samting we oli talem se oli save kamaot from blad transfyusen i mekem se ol denja ya oli nating nomo?

Dokta Kitchens i talem bakegen 16 ripot blong ol stadi we oli mekem long saed blong 1,404 Wetnes blong Jeova we oli katem olgeta, oli no wantem transfyusen from we oli obei long loa blong Baebol we i talem se ‘stap longwe long blad.’​—Ol Wok 15:​28, 29.

?Samting we i kamaot? “Disisen we ol sik Wetnes blong Jeova oli mekem blong no tekem blad transfyusen taem dokta i katem olgeta from ol bigbigfala sik, i mekem se jans blong olgeta blong no ded i go antap 0.5% kasem 1.5%. I no klia hamas taem oli blokem sik mo ded from fasin ya blong no tekem transfyusen, be ating plante moa taem bitim denja we i kamaot from oli no tekem blad transfyusen. (Mifala nomo i putum narafala raeting.) ?Wanem poen blong hem? Eni denja we i kamaot from oli no tekem blad ating i smol moa bitim ol denja we i joen wetem fasin ya blong tekem blad transfyusen.

Taswe, Kitchens i askem gudfala kwestin ya: “Sipos fasin blong no givim blad transfyusen long ol Wetnes blong Jeova i mekem smol sik nomo mo ded i kamaot mo i blokem bigfala sik mo nid blong yusum bigfala mane, ?i stret we namba blong ol sikman we oli kasem blad transfyusen i mas godaon?”

Olgeta we oli no akseptem blad transfyusen from ol pruf olsem, bambae oli obei tu long loa blong Man we i Wokem yumi.