Olsem Wan Tri

“OL KRANGKE man olsem mi oli stap mekemap ol gudfala toktok (poem), be God nomo i save mekem wan tri.” Joyce Kilmer, man blong raetem ol gudfala toktok, i stap tokbaot olsem wanem ol tri oli gud no naes nao hem i leftemap God from hem i wokem ol tri ya.

Jeova God i bin mekem plante defren kaen tri, oli naes, mo ol man oli save yusum olgeta. Ol tri we oli smosmol mo olgeta ya tu we oli bigwan, oli naes tumas mekem se i no gat tok we i save talem stret se oli olsem wanem. Antap moa, ol tri oli givim kakae, faea, mo haos. Mo ol man blong wokem ol samting oli gohed blong faenem ol nyufala rod blong yusum ol wud.

Insaed long Baebol, samtaem ol tri oli save minim ol kingdom, ol king, mo ol wanwan man. (Esikel 31:​1-18; Daniel 4:​10-26) Baebol i joenem ol tri wetem fasin glad, pis, plante samting we man i gat from rul blong Jeova mo fasin blong mekem ol man blong hem oli harem gud bakegen. (1 Kronikel 16:33; Aesea 55:12; Esikel 34:27; 36:30) Baebol i promes tu se ol dei blong ol man blong God bambae i olsem ol dei blong wan tri. (Aesea 65:22) Samting ya i gat bigfala mining taem yumi tingbaot se sam tri oli laef long plante handred yia.

Wan man blong raetem Ol Sam long Baebol i talem se wan man we i laekem ol loa blong God bambae ‘hem i olsem wan tri we i gru long saed blong wora we i stap ron. Tri ya i stap karem frut long stret taem blong hem, mo lif blong hem i no save drae. Mo long sem fasin man ya tu i stap win long evri samting we hem i stap mekem.’ Wan tri we i stap grin gud kolosap long plante wora i pulum man blong raetem Sam blong i tingbaot man we i “glad blong folem loa blong Hae God,” man olsem i harem gud long plante rij samting long saed blong speret. (Ol Sam 1:​1-3) Sipos yu yu rili laekem ol loa blong God mo Tabu Tok blong Hem, bambae yu yu save laef longtaem olsem laef blong wan tri. I tru, taem yu yu mekem fasin blong laef blong yu i laenap wetem stret save blong Jeova God mo Jisas Kraes, yu yu save gat hop blong laef we i no save finis.​—Jon 17:3.