Nem Blong God

“Sipos Hae God i no bildim haos, wok blong ol man blong bildim haos i blong nating nomo.” Hemia nao tok we yumi ridim long Latin hanraet ya. Ol tok ya oli stanap long Baebol long buk blong Ol Sam 127:1, mo insaed i gat wan dip trutok: Enikaen wok we Jeova i no blesem hem, bambae hem i blong nating nomo.

Hanraet ya blong 1780, yumi save faenem long wan bilding long Kolombo, Sri Lanka, mo hem i impoten from, i gat nem blong God, Jeova long hem. (Lukluk foto.) Long taem bifo, oli yusum nem ya long plante ples. Plante taem oli raetem nem ya long ol bilding, ol haos prea, mo tu long ol mane. Ol misinari oli yusum nem blong God taem oli tekem Baebol i go long ol ples farawe, mo i klia se hemia nao risen from wanem yumi save faenem hanraet ya long Sri Lanka.

!Tede ol samting oli defren! Smol namba nomo blong man we oli talem se oli Kristin oli kea long nem blong God. Mo tu sam man blong stadi oli tok agens long ol Wetnes blong Jeova from we oli stap leftemap nem ya. ?From wanem? Samfala oli talem se, from yumi no save stret olsem wanem oli talem nem ya long Hibru lanwis. ?Be hamas man i save stret rod blong talem nem blong Jisas long olfala Hibru lanwis? Be stil, ol man long olgeta ples long wol oli yusum mo oli respektem nem blong hem.

Nem blong God i impoten tumas long Jisas. Hem i tijim yumi blong prea se: ‘Yu mekem nem blong yu i tabu.’ (Matyu 6:9) Mo jes bifo long ded blong hem, hem i talem long God se: “Mi mi stap talemaot nem blong yu, blong mekem ol man ya we yu yu tekemaot olgeta long han blong wol blong givim long mi, oli save yu.” (Jon 17:6) Ol trufala Kristin oli ol man we oli biaen long Jisas. Olgeta tu oli mas ‘talemaot nem blong God.’ Ol Wetnes blong Jeova oli mekem olsem, mo Jeova i stap blesem “haos” blong olgeta bigwan. Tok ya blong Ol Sam i stret long olgeta se: ‘!Olgeta we Jeova i God blong olgeta, olgeta ya bambae oli harem gud!’​—Ol Sam 144:15.