?Fasin Kros Blong Mi No Helt Blong Mi?

?HU MAN i no stap kam kros samtaem? Samting ya i stap kamaot long yumi evriwan. Samtaem fasin kros we i no bitim mak i stret. Be, blong talem stret, ?i no tru se plante taem i no nidim we yumi kros (no yumi bitim mak long hem)?

Baebol i talem long yumi se: “I nogud yu kros, i nogud yu faerap, i nogud yu wari. Ol samting ya i rod blong kasem trabol nomo.” (Ol Sam 37:8) ?Advaes olsem i waes olsem wanem? ?Advaes ya i save jenisim helt blong yu long fyuja?

Long nyuspepa ya The New York Times haf blong hem long saed blong “Helt” i talem se:

“Ol man we plante taem oli faerap long kros no we oli stap kros oltaem from wan samting we oli ting se narafala i mekem long olgeta, maet oli stap mekem samting we i moa nogud long olgeta bitim we oli no stap glad nomo. Maet oli stap kilim olgeta oli ded.”

Naoia, ol man blong stadi long bisnes ya oli stap hivimap plante save we i soemaot se fasin blong stap kros oltaem i spolem bodi bigwan, hem i sem mak no i moa nogud bitim fasin blong smok sigaret oltaem, fatfat tumas, mo kakae ol samting we oli gat tumas gris long olgeta, ol fasin ya we oli bigfala denja we oli save kilim man i ded taem hem i no olfala yet.

“Dokta Redford Williams, wan man blong stadi long meresin blong winim ol fasin blong man long ‘Duke University Medical Center’ i talem se: ‘Ol stadi blong mifala oli soemaot se bigfala fasin kros, we i kamaot from fasin blong no trastem narafala, i sem mak long ol narafala samting we mifala i save long olgeta we oli save spolem helt.’”

Ol stadi oli soemaot se ol man we oli stap kros long ol samting we oli kamaot evri dei long laef, bodi blong olgeta i wokem moa hormon we i mekem man i kros. Fasin blong olgeta blong faerap oltaem long kros i save mekem se gris long blad (cholesterol) we i gud mo gris long blad we i nogud, tufala i no skelgud, ale samting ya i save mekem sik long saed blong hat i kamaot.

Maet samfala i talem se, ‘Be hemia prapa fasin blong mi’ no, ‘Hemia fasin we mi mi gruap wetem.’ Be, samting ya i no min se yu no save jenisim fasin ya, sipos yu rili traehad blong folem ol advaes blong God. Long prapa Baebol blong yu, traem jekem advaes blong hem long saed blong fasin kros mo faerap long kros, we oli stap long Proveb 14:​29, 30; 22:​24, 25; Efesas 4:26; Jemes 1:​19, 20.

Sipos yu folem waes ya we i kamaot long God, samting ya i save mekem helt blong yu i kamgud moa, mo i save mekem laef blong yu i longfala moa. Times magasin ya i talem se: “Plante man we oli stadi long bisnes ya oli talem se ol man blong kros oli save mekem se oli no ded kwiktaem sipos oli no kwik tumas blong tokbak mo blong kam kros.