?Oli Save Mekem Yu Yu Harem Gud?

MAGASIN ya we yu stap holem long han blong yu, stampa plan blong hem i blong leftemap tingting, i stap mekem yu tingbaot ol rul blong Baebol blong mekem ol famle oli stap gud mo i pulum wanwan man blong i gat stret fasin. Hem i soemaot se Baebol i bin tokbaot ol trabol long taem blong yumi, mo i talemaot rod blong winim​—Kingdom gavman blong God. ?Olsem wanem, yu yu save haremgud long Wajtaoa mo fren blong hem Wekap! magasin?

Long Filipin, wan woman we nem blong hem Vilma i raetem se: “Sipos i gat eni wod blong talem long saed blong magasin blong yufala, bambae mi jusum ‘nambawan.’ Fastaem we mi luk mo mi ridim Wekap! mo Wajtaoa magasin blong yufala hemia taem mi stap long wan bas we mi tekem long Manila blong gobak long haos. Plante taem mi karem nyuspepa wetem mi long bas, be long taem ya mi no karem wan wetem mi.

“Long trep ya, i gat wan man we i no olfala tumas i sidaon kolosap long mi we hem i gat ol buk blong yufala. Afta we hem i ridim Wekap! magasin, hem i tekemaot wan narafala magasin, Wajtaoa. Mi tekem jans blong askem Wekap! magasin ya. I tru tumas, mi rili harem gud blong ridim ol magasin ya from ol atikol ya oli intres tumas, oli kamaot long stret taem mo oli leftemap tingting.”

Woman ya i finisim tok blong hem se: “Mi wantem kasem ol magasin blong yufala. Plis soem long mi olsem wanem mi save kasem olgeta.” Branj ofis blong ol Wetnes blong Jeova long Filipin i glad blong ademap nem blong woman ya long lis blong olgeta we oli stap yusum blong sanem leta.