Olsem Ol Gol Apol

!OL APOL​—oli mekem man i glad blong luk mo testem olgeta! Baebol i yusum naesfala frut ya olsem wan pijatok we i pulum tingting blong yumi taem hem i talem se: “Tok we wan man i talem long prapa taem blong hem, i olsem sam gol apol long wan plet selva.” (Proveb 25:11) ?Wanem mining blong tok ya?

“Sam gol apol long wan plet selva” maet i soemaot wok blong wan man we i stap katem ol samting long wud no ston olsem we oli katem wan plet selva wetem gol frut long hem. From we ol faswan vas blong japta ya oli tokbaot fasin blong kam kolosap long wan king, vas ya i save tokbaot ol presen we oli givim long wan rula​—sam samting we oli flasemgud long gol olsem ol apol we oli putum long ol selva plet. (Proveb 25:​6, 7) !Tru ya, samting ya i luk naes tumas!

Wan fasin naes olsem i kamaot long tok we i stret, i soem respek, oli talem long stret taem blong hem, nating se oli raetem no oli talem. Oli mekem man i haremgud, leftemap tingting, mo givhan long plante rod. Antap moa olgeta tok blong Baebol we oli kamaot from tabu speret blong God oli olsem “sam gol apol long wan plet selva.”

Olsem waes tok we King Solomon i talem long Proveb 25:​11, hem i ‘stap skelem blong faenem ol gudfala tok mo fasin blong raetem ol stret tok blong trutok.’ (Eklesiastis 12:10; Proveb 25:1) Sam handred yia biaen, Kristin aposol Pol i bin raetem se: “Olgeta tok ya blong Baebol oli kamaot long God fastaem mo oli stret gud.” (2 Timote 3:16) Yes, Baebol i gat ol advaes we oli stret gud, ol profet tok, ol pija tok, mo ol trutok we oli saengud mo oli naes tumas mekem se oli bitim bigwan ol wok blong wan man blong dro we i gat gudhan. Mo tu, enikaen man we i kasem waes we i kamaot long Tok blong God, Baebol, i kasem wan samting we hem i no save pem wetem mane mo hem i gat long tingting blong hem hop blong laef we i no save finis.​—Proveb 4:​7-9; Jon 17:3.