?Go Long Heven No Long Hel?

“?WANEM jans blong yu, go long heven no blong go long hel?”

Hemia nao stampa kwestin we oli askem long plante man Amerika long wan stadi we oli mekem i no longtaem. ‘Princeton Religion Research Center’ i prentem risal blong stadi ya long buk ya Religion in America 1992-1993.

?Bambae yu ansa olsem wanem? ?Hasban no waef blong yu no ol narafala we yu laekem tumas oli gat jans blong go long heven afta long ded? ?Yu ting se maet yu, no olgeta, oli save go long hel?

Stadi ya i soemaot se i gat 78 pesen blong ol man we oli ting se oli gat gud jans no nambawan jans blong go long heven, mo namba ya i bitim namba we oli talem olsem 40 yia bifo. ?Hel? Kolosap 77 pesen blong ol man oli talem se oli gat smol jans nomo blong oli go long hel.

?Ansa blong olgeta i stanap long stret save blong Baebol? I gat kolosap 4 aot long ol 10 man we oli talem se oli no stap go plante taem long skul naoia olsem we oli bin mekem faef yia bifo. I gat 28 pesen blong ol man nomo oli talem se oli stap joen long ol grup blong stadi Baebol mo i gat 27 pesen blong ol man we oli joen long ol klas blong kasem tijing long saed blong skul.

Sipos yu stadigud long Baebol, bambae yu sapraes taem yu faenem sam trutok. Eksampel, Baebol i talem stret se taem Jisas i ded hem i go long “hel,” olsem we i stap long sam translesen blong Baebol. (Ol Wok 2:​31, King James Version; “Hades,” New World Translation) Tok blong God i pruvum tu se King Deved mo Jon Baptaes tufala i no go long heven taem tufala i ded. (Matyu 11:11; Ol Wok 2:29) Hemia ol trutok ya, oli no tingting blong ol man nomo we i kamaot long wan stadi we oli mekem long ol skul.

Sam narafala trutok we i save pulum tingting blong yu se: Baebol i tijim se ol aposol blong ­Jisas wetem wan stret namba blong ol narafala bambae oli go long heven blong rul wetem Jisas. Be, bigfala namba blong ol man we oli ded finis oli bin go long beregraon blong ol man nomo. God bambae i mekem olgeta ya oli laef bakegen, i givim laef long wol ya wetem jans blong kasem wan laef we i hapi, i gat mining, mo i no save finis long paradaes long wol.

Ol Wetnes blong Jeova oli glad blong givhan long yu blong yusum Baebol blong putum wan strong fandesen blong hop ya.