Wan Naet Blong Tingbaot Bakegen

BITIM 3,500 yia bifo, long wan dei blong tingbaot olwe, Jeova God i talem long ol man Isrel we oli slef long Ijip, blong kilim wan smol sipsip mo saksakem blad blong hem long ol pos blong doa mo antap long doa blong haos blong olgeta. Long semfala naet ya, enjel blong God i pas ova long ol haos we oli putum mak ya long olgeta be i kilim i ded ol fasbon boe long ol haos blong ol man Ijip. Biaen, ol man Isrel oli fri. Stat long taem ya kasem naoia, ol man Jyu oli stap mekem lafet blong Pasova, long dei blong yia we i makem samting ya we i bin kamaot.

Kwiktaem afta we Jisas Kraes wetem ol aposol blong hem oli mekem lafet blong Pasova finis, hem i putumap wan kakae we bambae i blong tingbaot bakegen ded blong hem we i olsem wan sakrifaes. Hem i givimaot bred long ol trufala aposol blong hem mo i se: ‘Yufala i tekem, yufala i kakae. Hemia i minim bodi blong mi.’ Nao i givim wan kap blong waen long olgeta mo i se: ‘Yufala evriwan, yufala i dring long hem; from we hemia i minim blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man.’ Jisas i talem tu se: “Yufala i mas stap mekem samting ya blong tingbaot mi bakegen.” (Matyu 26:​26-28; Luk 22:​19, 20) Ale Jisas i talem long ol man blong hem blong holem fasin blong tingbaot ded blong hem.

Ol Wetnes blong Jeova oli glad tumas blong askem yu blong joen wetem olgeta blong mekem Memoriol blong ded blong Jisas. Yu save go long Haos Kingdom we i stap kolosap long haos blong yu. Askem long ol Wetnes long ples blong yu wanem stret taem mo ples we samting ya bambae i kamaot long hem. Dei blong Memoriol ya long 1994 i Sarede, Maj 26, mo bambae oli pasem bred mo waen afta we san i godaon.