Ripot Long Wok Blong Kingdom
Trutok Blong Baebol i Mekem Wan Famle i Joengud
TEDE, long plante ples long wol, kolosap se i no moa gat fasin joengud long famle. Be, Baebol i soemaot samting we famle i mas mekem blong gat fasin joengud. Tingbaot ol tok blong Jisas se: “Man we i harem ol tok ya blong mi, nao i stap mekem ol samting ya, hem i olsem wan waes man we i wokem haos blong hem antap long wan bigfala ston.” (Matyu 7:24) Long medel blong ol Wetnes blong Jeova, plante taosen famle oli kasem fasin joengud taem oli folem ol tok ya mo taem oli yusum Baebol olsem stampa samting blong bildim wan famle we i joengud. Sam narafala tu oli kasem fasin joengud olsem, olsem eksampel we i kam biaen i soem.
Taem Daniel i stap mekem wok blong ami long Franis, wan lida blong skul i talem long Daniel blong pem wan Baebol. Daniel i pem wan, mo i stat blong ridim oltaem. Biaen oli sanem hem i go long Tahiti. Sam long ol soldia we oli fren blong Daniel, oli ol Adventis, mo ol narafala oli ol Momon. Plante taem, oli storeyan long ol samting long saed blong skul. Wan dei wan hed kapten blong ol ami i talemaot Daniel long waef blong hem, we i wan Wetnes blong Jeova. Waef blong hem i spenem wan ful aftenun blong ansa long ol kwestin blong Daniel mo i talem long ol Wetnes blong Jeova long ol kongregesen long Tahiti blong visitim hem. Smoltaem biaen hem i stat blong stadi long Baebol.
Papa mama blong Daniel we tufala i stap long Franis, tufala i strong long Katolik. Papa blong hem i wan man blong givim advaes long ol skul pikinini mo i stap lukaot long ol lesen long saed blong jyos long wan Katolik skul blong ol pikinini. From we Daniel i wantem serem ol sas samting ya wetem papa mama blong hem, hemia ol save long saed blong speret we hem i stap lanem, sloslou, hem i putum sam vas blong Baebol long ol leta we hem i stap raetem long tufala.
Fastaem mama blong hem i glad, be biaen hem i sek taem i faenem nem blong Jeova long wan long ol leta blong boe blong hem. Sam dei biaen, hem i harem wan program long radyo we i tokbaot ol Wetnes blong Jeova se oli wan “skul we i denja.” Hem i raet long Daniel, i askem long hem blong lego ol Wetnes kwiktaem. Be, Daniel i gohedgud long stadi blong hem long Baebol mo i no longtaem, hem i mekem plan blong lego wok blong ami mo gobak long Franis.
Taem Daniel i kasem Franis bakegen, hem i spenem evri sapa—samtaem i kasem long medel naet—blong tokbaot Baebol wetem mama blong hem. Biaen, mama blong Daniel i agri blong go wetem Daniel long wan Haos Kingdom. Taem hem i go long faswan miting, hem i laekem tumas, mekem se hem tu i stat blong stadi Baebol. Hem i gohed kwik mo i no longtaem biaen, hem i tekem baptaes.
Papa blong Daniel i wan man we i no gat fasin agens, be hem i strong tumas long ol wok blong hem long saed blong bisnes mo skul. Nating se i olsem, wan taem, hem i tekem trak mo i karem waef blong hem mo Daniel i go long wan distrik asembli. Hemia long Julae 14, mo hem i gat tingting blong wajem ol maj blong Bastil Dei long taon. Taem hem i stap wet, hem i tekem disisen blong lukluk insaed long haos asembli, from we hem i wantem save samting we i stap hapen insaed. Hem i laekem tumas oda mo pis we hem i luk long medel blong ol man blong Jeova, mo taem hem i wokbaot i go long ol defren ples blong wok blong asembli, evriwan oli stap singaot hem se “brata.” Hem i fogetem maj blong Bastil Dei mo i stap long asembli gogo kasem en blong hem. Hem i askem wan man blong mekem Baebol stadi wetem hem mo hem i gohedgud blong lanem trutok. Be, moa hem i lanem, moa tingting blong hem i trabol from wok blong hem, ale long taem ya we hem i gat 58 yia, hem i lego wok blong hem. Naoia trifala evriwan long famle, oli givim laef blong olgeta long Jeova mo tekem baptaes, mo trifala i stap joengud tugeta blong mekem wok blong Jeova.
Hemia trutok blong Baebol we i mekem famle blong Daniel i joengud. Trutok ya i save mekem ol narafala famle tu oli joengud, sipos oli lanem mo folem wetem fulhat blong olgeta.