Ripot Long Wok Blong Kingdom

“Wan Samting We i Stap Oltaem Blong Makem Fasin Blong Wokgud Tugeta”

KOLOSAP long poen long saot blong Spen, i gat wan bigfala laem ston we oli kolem Ston blong Gibralta. Long plante handred yia, ston ya, nating se i no save toktok, i bin stap olsem wan wetnes long fasin rao blong ol man blong politik mo fasin seraot blong ol kantri. Long defren fasin, i no longtaem i pas, Ston blong Gibralta i kam wan samting blong makem fasin blong wok tugeta mo fasin joengud, tufala fasin we long wol tede, kolosap se ol man oli no moa soemaot.

Taon blong La Linea, Spen, i stap tri kilomita nomo longwe long Ston blong Gibralta. Long ples ya, wok blong bildim Haos Kingdom blong ol Wetnes blong Jeova i mekem se plante handred volontiaa wokman oli kam wanples, oli glad blong givim taem mo paoa blong olgeta olsem presen blong mekem wok ya. Taem oli stap wok blong bildim wan stret ples blong wosip long Man we i Wokem Olgeta Samting, Jeova God, sloslou bigfala Ston blong Gibralta we i stap kolosap long olgeta oltaem i no moa impoten, taem oli skelem wetem bigfala wok ya blong bildim Haos Kingdom we oli stap mekem.

Ol man blong talemaot Kingdom we oli stap long ples ya oli sanem ripot we i kam biaen:

“Naen handred volontia wokman we oli glad blong wok, oli wok long dei mo long naet, stat long Fraede aftenun, Septemba 24, 1993. Long seven klok long Sande naet, oli stanemap wan nyufala saen finis blong soem se bilding ya i wan Haos Kingdom blong ol Wetnes blong Jeova, mo oli mekem faswan pablik tok long nyufala bilding ya we i naes tumas.

“Plante Wetnes blong Gibralta we i stap kolosap, oli krosem boda,b oli kam blong halpem ol brata blong olgeta long Spen. Wan volontia, we hem i wan man Gibralta i talem se: ‘Ol fasin seraot blong politik oli no spolem kampani blong mifala olsem wan brata raonabaot long wol.’ Hem i gohed se: ‘Sam yia bifo, ol Wetnes long La Linea, oli kam halpem mifala blong bildim Haos Kingdom blong mifala long Gibralta, ale naoia mifala i glad blong givimbak long olgeta, fasin kaen ya we oli bin soem long mifala.’

“Blong givhan long bigfala fasin traehad long tu kongregesen blong ol Wetnes blong Jeova mo plante handred volontia we oli gat gudhan blong wok we oli aot long eria blong Andalusia, oli kam blong givhan, taon blong La Linea i mekem disisen blong givim graon we oli nidim olsem wan presen. Taem mea blong La Linea i visitim ples ya we oli stap bildim Haos Kingdom long hem, hem i talem se: ‘Oltaem gavman blong Spen long ples ya oli givim graon blong bildim ol jyos blong Katolik. ?From wanem mifala i no save mekem i sem mak long ol narafala skul? Mi sapraes tumas long ol volontia ya we oli no tingbaot olgeta fastaem, mo mi harem long filing blong mi se mifala i mas sapotem olgeta. Hemia nao fasin we yumi nidim moa long wol ya we ol man oli stap seraot long hem.’

“Hem i tokbaot Haos Kingdom olsem ‘wan samting we i stap oltaem blong makem fasin blong wokgud tugeta.’ Tru ya, samting we i mekem ol man oli sapraes tumas, i no plan, no saes blong bilding. !Defren nao, samting we i mekem plante man long taon ya oli sapraes, hemia se ol man we oli wokem bilding ya, oli no kasem pei mo oli bildim haos ya long 48 haoa nomo!”

I rili tru se ol Wetnes blong Jeova long La Linea mo long ol ples we oli stap raon long ples ya, oli pruvum se oli bilif long ol tok blong Galesia 6:10. Long vas ya, aposol Pol i givim advaes long ol brata sista blong hem se: “From samting ya, oltaem, sipos yumi gat jans, yumi mas mekem i gud long olgeta man. Antap moa, yumi mas mekem olsem long olgeta ya we oli bilif long Kraes, nao oli brata blong yumi.”

[Ol futnot]