?Wanem Fyuja Blong Ol Pikinini Blong Yumi?

OL DENJA blong nyuklia​—nating se ol bom we ol teroris oli sakem no ol akseden long ol faktri blong mekem ol nyuklia paoa​—i stap mekem yumi evriwan i harem nogud. Maet yu stap wari moa long saed blong ol pikinini, olsem ol pikinini no bubu blong yu. Sore tumas blong save se denja blong nyuklia i save spolem helt mo fyuja blong eni pikinini.

Be yu no letem tingting blong yu i foldaon. I gat wan samting we i mekem se yu save gat gudfala tingting long saed blong fyuja blong ol pikinini. Stampa blong hop i stap, i no long fasin traehad blong ol man blong protektem ol pikinini blong yumi, be long wan fyuja we i stap long han blong Man we i Wokem Yumi.

Taem Pikinini blong God, Jisas, i tijim ol man long Medel Is, hem i soem se hem i tingbaot ol pikinini. (Mak 9:​36, 37, 42; 10:​13-16) Baebol i soem se bambae God i soem sem tingting olsem, taem hem i finisim ol denja blong nyuklia mo i mekem wan paradaes long ful wol. Ol pikinini blong yumi mo yu tu, oli save haremgud long samting ya.

Sipos yu wantem kasem moa save no yu wantem wan man i kam luk yu blong mekem wan fri Baebol stadi wetem yu, plis raet long Association “Les Témoins de Jéhovah,” B.P. 787, Nouméa, Nouvelle-Calédonie, no long wan adres we i stret long ples blong yu we i stap long pej 2.