?From Wanem Ol Man Nogud Oli Haremgud?
“?FROM wanem ol man nogud oli gohed blong stap laef?” Job, wan man blong bifo we i fasgud long God i askem kwestin ya, mo kam kasem tede, ol man oli bin askem kwestin ya plante taem bakegen. Ating kwestin ya i stap long tingting blong plante man long ples ya we bifo oli kolem Yugoslavia (olsem woman ya we i stap long faswan pej blong magasin ya) we oli stap krae from olgeta we oli safa long wan nogud faet. ?From wanem ol man nogud oli laef mo oli haremgud tu? Olsem Job i soemaot, plante taem, “i gat pis long haos blong olgeta, i no gat samting blong mekem olgeta i fraet, mo stik blong God i no kam long olgeta.”—Job 21:7, 9.
?Samting ya i minim se i blong nating nomo we man i mekem wok blong God, laekem ol man we oli stap raonabaot, mo no mekem ol fasin we oli no stret? !No gat! Baebol i givim stret tingting long yumi taem i talem se: “Bambae yu no jelas long ol man we oli stap mekem samting nogud. Nating we ol man nogud oli stap win, be bambae yu no harem nogud from. Bambae oli lus olsem gras we i drae, bambae oli ded olsem ol smosmol tri we oli ded long draetaem. Yu mas trastem MASTA, mo yu mas mekem ol fasin we i gud.”—Ol Sam 37:1-3, The New English Bible.
Yes, hem i blong smoltaem nomo we ol man nogud oli stap haremgud. Tru ya, laef blong olgeta i sot we i sot, be olgeta we oli stap mekem wok blong God oli gat wan nambawan hop long saed blong fyuja. I no longtaem, bambae promes ya blong God i kamtru se: “[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” (Revelesen 21:4) Ol stret man nomo, i no ol man nogud, bambae oli luk taem ya. !Samting ya i leftemap tingting blong yumi bigwan blong kam kolosap long God mo lanem blong mekem wil blong hem, nating se wanem samting ol man nogud raonabaot long yumi oli save mekem!
Sipos yu wantem kasem moa save no yu wantem wan man i kam luk yu blong mekem wan fri Baebol stadi wetem yu, plis yu raet long Association “Les Témoins de Jéhovah,” B.P. 787, Nouméa, Nouvelle-Calédonie.