“Hemia Fasin We Ol Tru Kristin Oli Mas Gat”

LONG buk blong hem blong 1990, Arbeit macht tot​—⁠Eine Jugend in Auschwitz (Bambae Wok i Kilim Yu Ded​—⁠Yang Man Long Oswits), Tibor Wohl we hem i laef tru long ol hadtaem blong Oswits i raetemdaon wan storeyan we hem i harem long medel blong tu man we tufala i stap kalabus wetem hem. Wan i man Ostria, we i talem se hem i “no man blong bilif.” Be, hem i presem ol prisina we oli werem ol pepol-traeangel​—⁠ol Baebol Studen, hemia nem we oli givim long ol Wetnes blong Jeova long kamp.

Man Ostria i talem long fren blong hem se, “Oli no joen long faet. Bambae oli letem ol man oli kilim olgeta bitim we olgeta oli kilim wan man. Long tingting blong mi, hemia nao fasin we ol tru Kristin oli mas gat. Mi mas talem long yu long saed blong wan nambawan ekspiryens we mi gat wetem olgeta. Mifala i stap wanples wetem olgeta man Jyu mo ol Baebol Studen long wan haos long kamp we ol prisina oli stap long hem long Stutof. Long taem ya ol Baebol studen oli mas wok strong, afsaed long kolkol. Mifala i no kasem save olsem wanem oli save stap laef. Oli talem se Jeova i givim paoa long olgeta. Oli nidim bred blong olgeta tumas, from we oli hanggri. ?Be oli mekem wanem? Oli hivimap olgeta bred we oli gat, oli karem haf blong olgeta mo givim narafala haf long ol brata blong olgeta, ol brata long saed blong speret, we oli kam long ol narafala kamp mo oli hanggri tumas. Mo oli mekem welkam long olgeta mo oli kisim olgeta. Bifo we oli kakae, oli prea, mo biaen fes blong olgeta i soem se oli glad tumas. Oli talem se oli no moa hanggri. Taswe, yu luk, biaen mi tingbaot se, ‘Hemia nao ol tru Kristin.’ Oltaem mi tingbaot se ol Kristin oli mas gat fasin olsem. !I gud tumas blong welkamem ol fren we oli hanggri long fasin olsem long Oswits!”