‘Ol Wok Blong Hem Oli Folem Hem’
LONG 8:50 long moning, long Tasde, Julae 28, 1994, George D. Gangas i finisim laef blong hem long wol ya. Hem i gat 98 yia. George Gangas, wan long olgeta we tabu speret i makemaot hem, i bin stap olsem wan memba blong Hed Kampani blong ol Wetnes blong Jeova stat long Oktoba 15, 1971.
Olgeta we oli savegud Brata Gangas, oli save fasin blong hem blong laekem tumas stret fasin mo blong no laekem nating ol rabis fasin. Oli rimembagud fasin blong hem blong talem bakegen se Setan i olsem wan prapa man blong gyaman, we i krangke, i rabis, mo i doti. Long defren fasin, hem i tokbaot Jeova olsem wan Papa we i gat lav, kaen fasin, fasin sore, gudfala fasin mo i stap keagud long yumi. Mo tu, plante man oli tingbaot we Brata Gangas i laekem tumas blong askem kwestin long saed blong Baebol. Long ol toktok blong hem, oltaem hem i askem kwestin—sam long ol kwestin ya oli isi nomo, samfala oli dip. Tru ya, hem i laekem tumas trutok blong Baebol.
Brata Gangas i baptaes long Julae 15, 1921. Hem i stat blong joen long fultaem minista wok blong prij (wok blong paenia) long Maj 1928. Taswe, hem i mekem fultaem Kristin minista wok blong 66 yia. Hem i kam wan memba blong Bruklin hedkwota blong Watch Tower Bible and Tract Society long Oktoba 31, 1928.
Store blong hem i stap long Wajtaoa blong Oktoba 15, 1966. Store ya i soemaot wan prapa man blong God long saed blong speret. Long store ya, hem i talem tok ya we i mekem yumi haremgud tumas, se: “Mi mi laekem laef tumas mo mi wantem se ol brata blong mi oli kasem laef. Mi bilif, olsem aposol Pol, se ol narafala samting oli ‘olsem samting blong mekem mi mi lus, nao mi lego olgeta blong mi save kasem samting we i moagud olgeta, we mi save Jisas Kraes, Masta blong mi.’”—Filipae 3:8.
Brata Gangas i soem long fasin blong hem se, hem i rili laekem laef tumas, mo hem i glad tumas blong serem ‘save blong hem long Jisas Kraes’ wetem ol narafala. !Yumi sore tumas we yumi no moa save luk Brata Gangas bakegen, be yumi glad tumas se naoia hem i kasem pei blong hem finis long heven! Naoia, ‘bambae hem i spel long wok blong hem, from we ol wok blong hem oli folem hem.’—Revelesen 14:13, New International Version.