Oli Skelem Bakegen Fasin Blong Karem Blad

LONG taem blong yumi we sik ya AIDS i kam antap bigwan, maet samting we i denja moa long ol sikman long hospital, hemia rum we oli katem man. Bitim ten yia finis, Dokta Richard Spence i bos long ples we oli katem man we oli no yusum blad, long Kuper Yunivesiti Hospital long Kamden, Nyu Jesi, Yunaeted Stet. Hem i talem se: “I no gat wan rod blong mekem saplae blong blad i klin olgeta.”

Yumi no sapraes se, hospital ya i stap lukaot long plante Wetnes blong Jeova we oli sik, from we, olsem ol man oli savegud, olgeta ya oli folem advaes blong Baebol blong no karem blad. (Levitikas 17:11; Ol Wok 15:​28, 29) Be, plante man we oli no ol Wetnes tu, oli stap kam long hospital ya, from we oli wari long ol trabol we i save kamaot long fasin blong karem blad, olsem sik blong hepataetas, AIDS, mo sam narafala sik bakegen. Wan buk, Courier-Post Weekly Report on Science and Medicine, i talem se: “From we sik ya AIDS i kam antap bigwan, samting ya i soemaot se i gat bigfala nid blong jekemgud blad. Be, samtaem fasin blong jekem blad i blong nating nomo, from we maet wan man i gat jem blong sik ya finis, be tes i no naf blong faenemaot.”

From ol trabol olsem, hospital ya blong katem man we oli no yusum blad, i stap yusum sam narafala samting long ples blong blad. Samtaem oli yusum blad blong prapa man ya we oli stap katem hem​—wan rod we samtaem, samfala Wetnes oli save agri long hem.a Wan narafala rod, hemia fasin blong yusum samkaen meresin we oli givhan long bodi blong sikman blong wokem moa blad kwiktaem. Samtaem oli yusum wan samting we i sem mak long blad be i no trufala blad, blong givhan long blad blong karem moa oksijen,b ale oli no nidim blong karem blad blong narafala man. Dokta Spence i talem se: “Ol Wetnes blong Jeova oli wantem nambawan kea mo meresin, be oli wantem long wan rod we i tekem ples blong blad.”

Ol Wetnes blong Jeova oli wantem talem tangkyu from fasin blong ol dokta we oli respektem bilif blong olgeta, blong wok wanples wetem olgeta mo halpem olgeta. From samting ya, oli rili kasem “nambawan kea mo meresin,” mo long semtaem, oli holem wan tingting we i no jajem olgeta long fored blong Jeova God.​—2 Timote 1:3.

[Ol futnot]