Taem “win i save blou long evri saed, be i no save givhan”

“TAEM wan man i no save wanem haba hem i stap go from, win i save blou long evri saed, be i no save givhan.” Oli talem se ol tok ya oli blong Lucius Annaeus Seneca, wan man Rom long faswan handred yia, we hem i gat bigfala waes blong wol ya. Ol tok ya oli pruvum trutok ya we ol man oli luksave longtaem finis: Blong gat wan laef we i no olbaot, i impoten blong traehad blong kasem sam mak.

Be, plante taem, laef i olsem wan bot we i stap drif nomo. Plante man oli glad nomo blong no fas long ol rif, mo blong no kasem ol bigsi, we oli olsem ol hadtaem long laef evri dei. From we oli no stap traem blong kasem wan mak, oli kam olsem ol wef blong solwora we “win i karem i go, mo i no longtaem, i karem i kambak.” (Jemes 1:​6, “Phillips”) Long saed blong ol man olsem, “win i save blou long evri saed, be i no save givhan” long olgeta.

Baebol i givim sam eksampel blong olgeta we oli kasem ol mak. Olsem nao, oli soemaot rod long ol Kristin tede. Moses “i stap luk oltaem long pei we bambae God i givim long hem.” (Hibrus 11:26) Pol i raetem se: “Mi stap resis i go stret long mak, blong mi winim praes.” Hem i leftemap tingting blong ol Kristin brata mo sista blong hem blong “gat sem tingting” nomo.​—Filipae 3:​14, 15, “Today’s English Version.”

I gud yumi lukluk oltaem long ol promes blong Baebol nomo, mo yumi folem bilif blong ol man ya we oli traehad blong kasem wan mak.​—Skelem wetem Hibrus 13:7.