Oli Mekem Samting Ya From Lav
WAN wido long Kanada, we i stap tru long God mo we i glad blong karem man i kam long haos blong hem, i stap trenem fo yangfala gel blong hem blong gruap olsem tru Kristin. Ol elda long kongregesen oli luk se i gat bigfala nid blong fiksimap sam samting long haos blong hem. Hem i no gat mane mo gudhan blong mekem wok ya hem wan. Taswe, blong folem rul blong Baebol long 1 Timote 5:9, 10, ol elda oli mekem disisen blong mekem wok ya blong hem. ?Olsem wanem?
Oli mekem plan blong wido ya mo ol pikinini blong hem oli stap aot long haos blong olgeta blong faef dei. Bitim 80 man long kongregesen oli givhan long wido ya wetem ful hat blong olgeta, oli givim ol samting blong wokem haos, mane, mo taem blong olgeta. Sam menet nomo afta we famle ya i aot, ol man blong wok oli kam fulap raon long haos olsem ol sugabag. Oli fiksimap afsaed long haos ya fulwan. Oli fiksimap mo pentem ol wol. Oli brasem mo saenemgud ol floa. Oli putum sam nyufala tael mo nyufala mat long floa. Oli jenisim ol rop blong lektrik mo laet we oli nidim. Mo tu, oli jenisim olgeta tebel, jea, no narafala samting long haos we oli olfala finis. !Long faef dei nomo, oli mekem fulwan haos ya i kamgud bakegen!
Fasin ya blong wok strong we ol brata oli soemaot i pulum tingting blong ol man raonabaot. Wan olfala we i gat 80 yia we i stap kolosap long haos ya, i sapraes tumas from wok blong ol Wetnes, mekem se hem i karem penbras blong hem mo i talem se bambae hem i givhan long olgeta. Masta blong wan man we i kam givhan, i givim wan mesin we sista ya i save yusum oltaem blong karemaot smok, taem hem i kuk long kijin. Wan narafala masta i givim ol nyufala kabod blong kijin, olsem presen. Wan man i sapraes tumas, mekem se hem i wantem lanem moa long saed long ol Wetnes blong Jeova. Hem i akseptem kwiktaem buk ya Yu Save Laef Blong Olwe Long Paradaes Long Wol.
Taem wido mo ol gel blong hem oli kambak, fes blong olgeta i soemaot klia se oli sapraes bigwan. Oli krae, oli laf, mo oli holholem olgeta—wan taem blong Kristin lav mo filing we oli no save fogetem. Yes, trufala lav mo fasin blong tingbaot olgeta long kongregesen we oli gat nid i wan mak blong ol trufala Kristin, from we Pol i raetem se: “Oltaem, sipos yumi gat jans, yumi mas mekem i gud long olgeta man. Antap moa, yumi mas mekem olsem long olgeta ya we oli bilif long Kraes, nao oli brata blong yumi.”—Galesia 6:10.