Kot i Mekem Disisen Long Saed Blong Ol Wetnes Blong Jeova

PLANTE taem Kot blong Apil long Tesalonaeka, Gris, i stap seftem dei blong harem toktok blong sam man agensem fo woman we oli Wetnes blong Jeova. Be, long Jun 8, 1995, oli agri blong harem olgeta. ?Wanem ol tok ya we oli talemaot agensem ol woman ya? Hemia se oli stap pulum ol man blong jenisim skul blong olgeta, wan samting we loa blong ol man Gris i bin agensem blong bitim fefte yia nao.

Be, taem kot i rere blong jajem bisnes ya, namba wan man blong givim wetnes agensem ol Wetnes​—hemia pris we i mekem se fofala woman ya oli mas pas long kot​—i ded finis. Nao, wan narafala pris i traem tok long ples blong man ya, be kot i no agri long tok we hem i givim. !Taswe, yumi no sapraes se i tekem 15 menet nomo blong mekem kot! Jaj i harem tok blong ol narafala man we oli givim wetnes agensem ol woman ya mo i faenem se fasin we olgeta oli mekem blong pulum ol man blong jenisim skul blong olgeta i no agensem loa. Disisen ya i soemaot se olgeta Kot long Gris oli rere blong respektem mo agri long disisen we Kot blong Yurop long saed blong Raet blong Ol Man, i bin mekem long 1993.

Yumi sapraes moa se trifala woman we oli wetnes long kot agensem ol Wetnes ya, oli kam sekhan long olgeta mo talem ol tok we i kamaot long hat blong olgeta blong leftemap olgeta. Wan long trifala woman ya i talem se: “Mifala i sore from samting ya we i hapen. I no fol blong mifala. Pris nao i fosem mifala blong putum yufala long kot. Be naoia we hem i no moa laef, mifala i wantem se yufala i kam long velej blong mifala mo long haos blong mifala.”

Taswe, bakegen, Jeova i givhan long ol man blong hem long Gris blong oli win. Long 1938 mo 1939, oli stanemap loa long Gris se ol man oli no save pulum ol narafala blong jenisim skul blong olgeta. Long 1993, Kot blong Yurop long saed blong Raet blong Ol Man, i talem strong se i rong blong jajem ol Wetnes blong Jeova folem wan loa olsem.​—Lukluk Wajtaoa blong Septemba 1, 1993, pej 27-31.