Ripot Long Wok Blong Kingdom

“Tok Blong God i Stap Goraon Moa Long Ol Man”

SAM haoa nomo afta we Kristin kongregesena i stanap, namba blong hem, 120 man, i go antap bitim 3,000. (Ol Wok 1:15; 2:41) Baebol i eksplenem se “tok blong God i stap goraon moa long ol man. Mo kampani blong ol man blong Jisas i stap kam bigfala moa long Jerusalem.” (Ol Wok 6:7) Sam yia biaen nomo, nyufala kongregesen ya i kam wan ogenaesesen we i kasem plante kantri blong wol, olsem Afrika, Esia, mo Yurop.

Tede tu, Kristin kongregesen i stap gru kwiktaem. !Eksampel, long Meksiko, long faef yia nomo, namba blong ol man blong talemaot Kingdom i kam antap 130,000, go kasem 443,640! Long 1995, wan man long evri 59 man long Meksiko oli kam long Memoriol blong ol Wetnes blong Jeova blong tingbaot ded blong Jisas. Be, taem blong tekem kakae long garen long saed blong speret long kantri ya i no finis yet. Store we i kam biaen i soemaot samting ya.​—Matyu 9:​37, 38.

Long wan taon long stet blong Siapas, i no gat wan man we i bin agri blong mekem Baebol stadi long haos blong hem wetem ol Wetnes blong Jeova, nating se oli talemaot gud nyus 20 yia finis long kantri ya. I gat wan man long taon ya we plante man oli fraet long hem, from we hem i stap kilim ol narafala man. Oli fraet long fasin blong hem sipos hem i faenemaot se oli stap stadi Baebol wetem ol Wetnes blong Jeova.

Tu Wetnes we oli go stap long ples ya, oli gat strong tingting blong winim trabol ya. Ale, tufala i mekem disisen blong go stret long man ya we i stap mekem ol trabol ya. Taem tufala i kasem haos blong man ya, waef blong hem i kamaot mo i lesingud long mesej blong tufala. Hem i intres moa long wanem samting Baebol i talem long saed blong laef long paradaes long wol. Be hem i luksave se hasban blong hem bambae i mekem trabol long hem sipos hem i stadi Baebol. Ol Wetnes oli eksplenem se sipos hem i no luklukgud long ol tok blong Baebol, bambae hem i no save lanem olsem wanem blong mekem wok blong God mo haremgud long laef long wol ya blong olwe. Hem i agri blong stadi Baebol.

Stret long samting we hem i bin talem, hasban blong hem i no agri long disisen we hem i tekem. Hem i blokem waef blong hem blong no yusum trak blong go long ol Kristin miting. Be hem i letem hem i yusum trak blong mekem ol narafala samting we hem i wantem mekem. Nating se man ya i mekem trabol long woman blong hem, oltaem woman i wokbaot blong go long Haos Kingdom blong ol Wetnes blong Jeova long eria blong hem. Haos Kingdom ya i stap samwe 10 kilomita longwe. I no longtaem, sam narafala man long taon ya oli luk se hem i no fraet, mo se hem i gat strong tingting blong gohed. Ol man oli stat blong lesin taem ol Wetnes oli go visitim olgeta. Samfala oli stat blong joen wetem woman ya blong go long ol miting. !Smoltaem biaen, ol Wetnes oli stap mekem kolosap 20 Baebol stadi long taon ya!

Wan fren blong woman ya i mekem disisen tu blong stadi Baebol, nating se hasban blong hem i traem blokem hem. Wan samting blong sapraes, hasban blong faswan woman nao i leftemap tingting blong woman ya blong stadi Baebol. Afta we hasban blong faswan woman i toktok wetem hasban blong woman ya, hem i no moa blokem waef blong hem. Olsem nao, ol sid blong trutok blong Baebol oli stat blong gru 20 yia biaen nomo. Naoia i gat bitim 15 man we oli stadi Baebol mo oli joen long ol Kristin miting, wetem tufala woman ya, we naoia oli stap talemaot gud nyus.

[Futnot]