!Letem Laet Blong Yu i Saenaot!

!SAYE, taem i kam blong olfala man ya i luk Mesaea ya we ol profet oli bin tokbaot! God i mekem Simeon i save se “bambae hem i no save ded, gogo i luk Mesaea ya blong Hae God fastaem.” (Luk 2:​26) !Simeon i glad tumas taem hem i kam insaed long haos prea, nao Meri mo Josef i givim bebi Jisas long hem blong i karem! Hem i presem God, i se: “Hae God, mi mi man blong wok nomo blong yu, be naoia yu save letem mi mi finis, we tingting blong mi i stap kwaet, from we . . . long ae blong mi nomo, mi mi luk rod blong yu blong sevem man. . . . wan laet blong givim laet long ol hiten man, mo hem bambae i leftemap nem blong mifala man Isrel, we mifala i man blong yu.”​—Luk 2:​27-​32; skelem wetem Aesea 42:​1-6.

Stat long baptaes blong Jisas, taem i gat 30 yia, gogo kasem ded blong hem, hem i olsem wan “laet” long wol ya. ?Long wanem fasin? Hem i givimaot laet long saed blong speret, taem hem i talemaot Kingdom blong God mo ol stampa tingting blong Hem. Hem i talemaot long klia ples olgeta gyaman tijing blong ol skul, mo i soemaot klia ol wok we oli blong tudak nomo. (Matyu 15:​3-9; Galesia 5:​19-​21) From samting ya, i stret we Jisas i talem se: “Mi ya mi laet blong ol man long wol.”​—Jon 8:​12.

Jisas i ded long yia 33 K.T.a ?Long taem ya laet i ded? !No gat! Taem Jisas i stap yet long wol, hem i talem long ol disaepol blong hem se: “Yufala i mas letem laet blong yufala i saenaot i kasem ol man.” (Matyu 5:​16) Taswe, afta we Jisas i ded, ol man blong hem oli gohed blong mekem laet i saenaot.

Olsem Jisas, ol Kristin tede oli mekem laet blong Jeova i saenaot taem oli prij. Oli “mas holem fasin blong man blong delaet,” oli mas saenaot olsem ol laet from gudfala eksampel blong Kristin laef blong olgeta.​—Efesas 5:8.

[Futnot]