Ripot Long Wok Blong Kingdom

Paoa Blong Tok Blong God We i Save Jenisim Man

APOSOL Pol hem wan i talem se, bifo, hem i ‘stap tok nogud long Kraes, i stap ronem ol man blong hem, i stap mekem i nogud long olgeta.’ (1 Timote 1:​13) !Be hem i jenis! Fasin blong aposol Pol i jenis bigwan, nao hem i save talem se: “Yufala i mas folem fasin blong mi, olsem we mi mi stap folem fasin blong Kraes.”​—1 Korin 11:1.

Tede, long wol, plante handred taosen man blong wosip long trufala fasin, oli stap mekem ol bigfala jenis long laef blong olgeta. ?Wanem i givhan long olgeta blong mekem olsem? Oli stap kasem moa save long Tok blong God, mo oli stap folem save ya long laef blong olgeta. Ekspiryens we i kam biaen i soemaot klia, olsem wanem Tok blong God i gat paoa blong jenisim man.

Long Slovenia, wan olfala man wetem woman blong hem oli stap long wan haos afsaed long velej. Hasban, nem blong hem Jože, i gat raonabaot 60 yia, mo i stap dring bitim mak. Nating se i olsem, hem i lukaotgud long waef blong hem, Ljudmila, we i sik. Wan dei, tu man blong talemaot Kingdom oli kam prij long Jože. Hem i talem long tufala Wetnes ya blong kam insaed long haos blong hem, nao oli mitim waef blong hem. Taem Ljudmila i harem mesej blong Kingdom, wora i ron long ae blong hem from we hem i glad tumas. Jože tu i laekem ol samting we hem i harem mo i askem plante kwestin. Ol Wetnes ya oli livim sam buk we oli tokbaot Baebol wetem tufala ya, nao oli aot.

Wan manis biaen, ol Wetnes oli kambak bakegen, mo oli luk buk ya Yu Save Laef Foreva Long Paradaes Long Wol i stap long tebel. Taem oli askem Jože se hem i karem buk ya wea, hem i talem se: “Wan long ol magasin we yufala i livim wetem mi, i gat pija blong buk ya i stap long laswan pej blong hem. Ale, mi mi raet i go long ofis blong yufala long Sagreb mo mi askem buk ya.” From we ol Wetnes oli luk se hem i intres, oli singaot hem blong kam long Haos Kingdom blong mekem Memoriol blong tingbaot ded blong Kraes. !Ol Wetnes ya oli glad tumas taem oli luk se hem i kam!

I no longtaem, oli statem wan Baebol stadi wetem tufala, mo tufala i gohedgud. Wan eksampel, oli soem long Jože tok ya long Baebol se, “yu no mas katem aedol, no . . . bodaon long olgeta, mo yu no mas letem man i pulum yu blong mekem wosip long olgeta.” Nao, wantaem nomo, hem i hivimap olgeta aedol blong jyos we oli stap long haos blong hem, mo olgeta pija tu, mo i sakem olgeta.​—Eksodas 20:​4, 5, NW.

Ale, Jože i stap kasem olgeta samting long saed blong speret we hem i bin tosta tumas from. Be, sore tumas, hem i tosta tumas from wan narafala samting tu. Long bitim 18 yia, hem i dring kolosap 7 lita blong waen evri dei. From we hem i stap dring tumas, hem i no stap keagud long bodi blong hem. Be, afta we hem i lanem tingting blong God long saed blong fasin blong dring bitim mak, hem i gat strong tingting blong jenis.

Hem i traehad sloslou blong winim problem blong hem blong dring tumas. Hem i stap makem long wan buk, hamas waen hem i stap dring evri dei. I no longtaem, hem i no moa stap olsem slef blong waen. Tru long Baebol stadi blong hem, hem i lanem tu se ol trufala Kristin oli mas klin long bodi blong olgeta. Taswe, hem i givim mane long ol Wetnes, mo i talem se: “!Ale, yufala i go pem eni klos we i stret, blong mi werem long ol Kristin miting mo wok blong prij!” Ol Wetnes oli pem olgeta samting we hem i nidim olsem ol traoses, stoking, sus, sot, kot, nektae, mo wan basket.

Afta we Jože mo Ljudmila tufala i stadi Baebol blong wan yia, tufala i joen wetem ol Wetnes long wok blong prij long ol haos wanwan. Tri manis biaen, long wan distrik asembli blong ol Wetnes blong Jeova, oli tekem baptaes long wora blong soemaot se oli givim laef blong olgeta long God. Nating se Jože i olfala mo helt blong hem i nogud, hem i joen oltaem long wok blong talemaot gud nyus, mo hem i wok olsem wan man blong givhan long kongregesen,a go kasem we hem i ded long Mei, 1995. !Ol gudfala frut we oli kamaot long laef blong man mo woman ya we tufala i gat tingtingdaon, oli soem klia se Tok blong God i gat paoa blong jenisim man!

[Futnot]