Trufala Fasin Blong Stap Sefgud—I No Isi Blong Kasem

ARNOLD i wan smol pikinini. Hem i gat wan gyaman puskat we oli wokem long kaliko. Hem i laekem puskat ya tumas. Long evri ples we hem i go​—taem hem i go pleplei, sidaon long tebel blong kakae, mo go long bed​—hem i karem puskat ya wetem hem. Puskat ya i mekem hem i haremgud, mo hem i harem se i stap sef. Wan dei, i gat wan trabol. !Puskat ya i lus!

Arnold i krae, ale mama, papa mo tri bigfala brata blong hem, oli lukluk olbaot insaed long bigfala haos blong olgeta, blong traem faenem puskat ya. Biaen, wan long olgeta i faenem puskat long wan kabod. Arnold nao i bin putum puskat ya long kabod, mo biaen, hem i fogetem weples hem i putum. Oli givimbak puskat long Arnold, nao hem i no moa krae. Hem i glad mo i harem se hem i stap sef bakegen.

!I gud tumas sipos yumi save stretem ol problem long isi fasin olsem​—faenem wan gyaman puskat long kabod! Be, long tingting blong plante man, problem blong stap sefgud i hadwok moa blong winim, mo i bigwan moa bitim samting ya. Long evri ples, kolosap olgeta man oli stap tingting se: ‘?Bambae mi ded from wan man i kilim mi no from raf fasin? ?Bambae mi lusum wok blong mi? ?Bambae famle blong mi i gat naf kakae? ?Bambae ol narafala oli no wantem joen wetem mi from we mi mi blong defren skul no laen?’

Namba blong ol man we oli no harem se oli stap sefgud, i bigwan. Ripot blong Yunaeted Nesen i soem se, kolosap tri bilyan man oli no gat dokta blong halpem olgeta blong winim ol sik. Antap long hemia, oli no gat ol meresin we oli nidim. I gat moa long wan bilyan man we oli pua tumas. Kolosap wan bilyan man, nating se oli save wok, oli no gat naf wok. Namba blong ol refujia i stap go antap. Long en blong 1994, 1 long evri 115 man long wol oli mas go laef olsem ol refuji. Evri yia, ol man we oli mekem bisnes blong salem drag long fasin haed, oli winim 500 bilyan dola from. Plante milyan man oli ded from ol raf fasin mo faet we oli joen wetem bisnes ya. Ol bigfala faet oli kilim plante milyan man i ded. Long 1993 nomo, i gat 42 kantri oli joen long ol bigbigfala faet. Mo long 37 narafala kantri, i gat ol trabol i kamaot from politik.

Faet, fasin pua, fasin blong brekem loa, mo ol narafala trabol we oli mekem se ol man oli no stap sef, evriwan oli joen, mo namba blong ol trabol ya i stap kam antap. I no isi nating blong winim ol problem ya, olsem we yumi faenem wan gyaman puskat long kabod. Yes, ol man bambae oli no stopem olgeta.

Tok blong God, Baebol, i givim woning long yumi, se: “Yufala i no mas trastem ol lida blong wol ya. Ol man ya oli no save sevem yufala.” Sipos i olsem, ?bambae yumi trastem hu? Vas ya i gohed, i se: “Hae God ya we i God blong Jekob, hem i mekem skae mo graon mo solwora, wetem olgeta samting we i stap long ol ples ya, mo man we i putum tingting blong hem i stap long hem, mo i stap lukluk long hem blong i givhan long hem, man ya bambae i harem gud.”​—Ol Sam 146:​3-6.

?From wanem yumi save trastem Jeova se hem bambae i karem fasin blong stap sefgud i kam long wol ya? ?I save gat wan hapi laef naoia we yumi stap sefgud? ?Olsem wanem God bambae i tekemaot ol samting we oli mekem se ol man oli no stap sefgud?

[Futnot]