Ol Dokta Oli Tokbaot Narafala Meresin Blong Tekem Ples Blong Blad

SAMWE 200 dokta long Yunaeted Stet oli hivap long Klivlan, Ohaio, long Sarede, Oktoba 7, 1995, blong tokbaot wan samting we ol dokta oli stap intres moa oltaem long hem: hemia meresin mo fasin blong katem man we oli no yusum blad.

Oli tokbaot sam had kwestin. Eksampel, ?olsem wanem sipos wan man i kasem strong sik ya we i no gat naf blad? ?Sipos wan bebi i bon bifo long stret taem blong hem, oli save givim wanem meresin long hem sipos oli no givim blad? ?Dokta i save katem hat blong wan man, we hem i no yusum blad? I gud blong save se, ol dokta oli bin katem sam man we oli kasem ol sik ya, mo oli winim sik blong olgeta we oli no yusum blad. Oli yusum ol samting we i halpem bodi blong wokem prapa blad blong hem.a

?From wanem i gat nid blong yusum narafala meresin long ples blong blad? Sharon Vernon, daerekta blong Senta blong Bladles Meresin mo Sejeri long St. Vinsen Jariti Hospital long Klivlan, i talem se: “Mifala i bin faenemaot se plante taem, blad transfyusen i pasem ol sik oli go long ol man, antap moa hepataetas.” Hem i gohed i se: “Nating sipos blad i no pasem wan sik i go long narafala, be hem i save spolem paoa blong bodi blong faet agensem ol sik.” I tru se oli mekem namba blong ol man we oli kasem AIDS from blad transfyusen i godaon naoia from we oli jekemgud blad. Be i gat plante sik yet we oli save pas i go long narafala, we ol tes ya oli no faenemaot. Mo nating se oli mas mekemrere gud ol samting taem oli katem man we oli no yusum blad, be fasin ya i mekem se ol hospital oli no spenem tumas mane, from oli no nid blong pemaot mane taem oli pas long kot from wan sikman i kasem blad we i nogud.

Long saed blong ol Wetnes blong Jeova, i gat wan risen we i moa impoten, blong oli no tekem blad: loa blong God i putum tabu long hem. (Ol Wok 15:29) Be, oli wantem kasem ol beswan meresin mo dokta blong winim sik blong olgeta. Taswe, oli wok tugeta wetem ol dokta we oli stap stadi long fasin blong stretem ol sik we oli no yusum blad. Fasin ya blong fiksimap sik i givhan long ol Wetnes blong Jeova, be tu long plante narafala we oli wari long denja we blad transfyusen i save givim.

[Futnot]

[Foto Credit Line Blong Pija Long Pej 32]

WHO photo by P. Almasy