“!Yu No Mas Sakemaot Olgeta!”

WAN nyuspepa we nem blong hem Corriere della Sera, i givim advaes ya se: “!Sipos wan no tu Wetnes blong Jeova oli kam kilkilim doa blong yu, yu no mas sakemaot olgeta!” Nyuspepa ya i stap tokbaot wan samting we i bin hapen long Treviso, long not blong Itali. Kolosap nomo wan bisnesman i lusum bitim 60,000 vatu from we hem i no wantem storeyan long tu Wetnes we oli kam luk hem long haos blong hem.

Nyuspepa ya i talem se, tu Wetnes oli kam luk man ya mo oli talem se: “Tede i wan gudfala dei long yu. Mifala i Wetnes blong Jeova, mo mifala i gat wan samting we i sas tumas blong givim long yu.” Taem oli talem tok ya, wantaem nomo bisnesman ya i satem doa, i no letem olgeta oli gohed blong toktok.

Sipos man ya i bin lesin, bambae hem i save se tufala Wetnes ya oli kam long haos blong hem blong karem paos blong hem i kambak, from we oli faenem paos ya long wan jea long ples blong spel. Nao ol Wetnes ya oli no gat narafala rod blong luk man ya, taswe oli karem paos blong hem i go long polis stesen. Long nekis dei, ol polis oli karem paos ya i gobak long bisnesman ya.

Nyuspepa ya Il Gazzettino di Treviso i talem se: “Sipos wan narafala man nao i bin stap long ples blong tufala [Wetnes ya] we man ya i sakemaot tufala, ating bambae hem i . . . kipim paos ya mo bigfala mane we i stap insaed long hem nomo. Be, ol Wetnes blong Jeova oli no save mekem olsem, from we oli folem stret fasin oltaem.”

?Wanem samting nao i pusum ol Wetnes blong Jeova blong “folem stret fasin oltaem”? Hemia lav we oli gat long God mo long ol man raonabaot long olgeta, folem ol tijing blong Jisas Kraes. (Matyu 22:​37-​39) From samting ya tu, ol Wetnes blong Jeova oli go long ol haos wanwan blong talemaot gud nyus long saed blong nambawan “nyufala wol” we Jeova God i promes long hem. !Wan mesej olsem we i givim hop, hem i sas moa i bitim enikaen sas samting we man i gat!​—2 Pita 3:​13.