Wan Profet Tok Blong Baebol i Kamtru
LONG Imperial Wo Musium long London, Engglan, i gat wan spesel kaen klok we hem i joen wetem wan smol lektrik mesin blong kaontem ol namba. Evritaem we han blong klok ya i muf i go kasem 3.31 seken, ale lektrik mesin ya i krae smol. Evri taem mesin ya i krae, hem i ademap wan moa long namba we i stap finis. Ol wanwan krae mo namba ya oli minim wan man, woman, no pikinini we i ded long ol faet we oli kamaot long laswan handred yia.
Smol lektrik mesin ya i stat kaontem ol namba ya long Jun 1989, mo bambae hem i finis long medel naet, long dei bifo we yia 2000 i stat. Long taem ya nao, namba we bambae i kamaot long mesin ya i mas kasem wan handred milyan—hemia fulnamba blong man we oli kaontem se oli ded long ol faet we oli kamaot long ol yia 1900.
Kolosap 2,000 yia bifo, Jisas Kraes i tokbaot ol samting we bambae oli makemaot wan spesel taem, olsem ‘ol man bambae oli mekem faet long ol narafala man, mo ol kantri bambae oli mekem faet long ol narafala kantri.’ Folem ol tok ya, longtaem finis ol Wetnes blong Jeova oli stap talemaot se ol rabis faet, graon i seksek, ol rabis sik, kakae i sot, mo plante narafala samting bakegen we oli kamaot evriwan wantaem long laswan handred yia, oli pruvum se yumi stap long ol “lasdei.” Taem ya i stat afta we Jisas Kraes i sidaon olsem King long heven, long yia 1914.—Luk 21:10, 11; 2 Timote 3:1.
Wajtaoa we oltaem i yusum Baebol blong pruvum ol tok blong hem, i talemaot gud nyus ya se i no longtaem, bambae Kingdom blong God i finisim ol man we oli spolem ol narafala, mo bambae hem i jenisim wol ya i kam wan paradaes. Be, ?olsem wanem long saed blong ol faet long fyuja? Baebol i talem se: “Yufala i kam, yufala i luk ol samting ya we Hae God i mekem. Yufala i luk ol bigbigfala wok ya we hem i mekem long wol. Hem i stap mekem ol faet oli finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”—Ol Sam 46:8, 9.
[Foto Credit Line blong pija long pej 32]
Clock: By Courtesy of the Imperial War Museum