Wan Buk We i Save Gat Paoa Long Hat Blong Man

RAON long wol tede, ol man oli wokem plante defren buk mo nyuspepa blong givim save long ol man mo blong tokbaot ol defren samting we man i laekem blong ridim.

?From wanem, buk we yu holem naoia long han blong yu, hem i spesel? Leta we i kam biaen, we hedkwota blong Watch Tower Society long Jemani i kasem, i ansarem kwestin ya:

“Ol gudfala brata, tangkyu tumas from ol traehad mo hadwok blong yufala. Taem mi mo tufala boe blong mi, mifala i kambak long miting, mi wantem tumas blong lesin long nyufala Wajtaoa [long kaset], nating se hem i haf pas naen long naet. Taem mi stap wasem ol plet, mi lesin long faswan haf we yumi stadi long hem (Epril 1, 1995). Mi harem i gud tumas nao mi wantem lesin long hem bakegen. Ale, mi stopem wok blong mi long kijin mo mi ridim haf ya [“!Yu Yu Sas Long Ae Blong God!”] we i stap long Wajtaoa mo long semtaem mi lesin long kaset bakegen. Haf ya i rili gat paoa long hat blong mi, antap moa paragraf fo mo faef. Nao, mi stat krae​—be i no blong longtaem. Mi talem tangkyu long Jeova se mi laef mo mi wan man blong hem. Mi talem tangkyu tu se, mi mo plante narafala man bakegen, mifala i save talemaot nem blong hem long ol man. I no gat risen blong harem se yumi nating nomo. Speret blong Jeova i stap wetem ol man blong hem. I gud yumi stanap strong longtaem mo stap strong long bilif, we yumi joengud oltaem. Mi sanem Kristin lav blong mi, sista blong yufala long saed blong bilif.”

Wajtaoa i go moa bitim we hem i givimaot save. Hem i gat paoa long hat blong ol man we oli ridim, mo i mekem man i haremgud from we i givim samting we oli nidim long saed blong speret, mo i leftemap tingting blong olgeta, olsem ol man oli nidim naoia. Yes, Wajtaoa i givim ‘kakae long stret taem blong hem.”​—Matyu 24:​45, NW.