Help Blong Haremgud Long Ol Fo Yia Blong Faet

LONG ol fo yia we faet i gohed long kantri ya we bifo nem blong hem Yugoslavia, plante man oli kasem hadtaem mo oli sot long plante samting. Long olgeta ya, i gat plante handred Wetnes blong Jeova we oli gohed nomo blong wosipim ‘God ya we i stampa blong olgeta fasin blong mekem man i haremgud.’​—2 Korin 1:3.

Long Sarayevo, ol man oli kasem hadtaem blong laef long bigfala taon we ol ami oli raonem long ol fo yia blong faet ya. I no gat lektrik, i no gat naf wora, faeawud, mo kakae. ?Olsem wanem long kongregesena blong ol Wetnes blong Jeova long Sarayevo long hadtaem ya? Ol Kristin long ol kantri raonabaot oli rere blong lusum laef blong olgeta, taem oli karem plante kakae mo ol narafala samting i kam long olgeta ya we oli gat bigfala nid. (Lukluk Wajtaoa blong Novemba 1, 1994, pej 23 kasem 27.) Ol brata long Sarayevo tu oli serem ol samting we oli gat wetem ol narafala brata blong olgeta, be oli serem ol samting long saed blong speret fastaem long ol narafala samting. Long taem ya we ol ami oli raonem taon, wan Kristin elda blong taon ya i givim ripot ya se:

“Mifala i tinghae tumas long ol miting blong mifala. Mi mo waef blong mi, wetem 30 narafala man, mifala i wokbaot 15 kilomita [9 mael] blong go long ol miting mo 15 kilomita blong kambak long haos. Samtaem ol haeman long taon ya oli talemaot se bambae oli openem wora saplae long taem ya we mifala i gat miting. ?Ol brata oli mekem wanem? ?Oli stap long haos no oli go long miting? Ol brata blong yumi oli laekem moa blong go long miting. Ol brata oli givgivhan long olgeta oltaem. Wanem samting we oli gat, oli serem. Wan sista long kongregesen blong mifala i stap jes afsaed long taon, kolosap long bus. Taswe, i isi lelebet long hem blong kasem faeawud. Mo tu, hem i stap wok long ples blong salem bred, mo pei we hem i kasem hemia flaoa blong wokem bred. Taem sista ya i gat jans, hem i kukum wan bigfala bred mo i karem i kam long miting. Afta long miting, taem ol brata oli stap kamaot, hem i givim wan pis bred long evriwan.

“I impoten tumas se i no gat wan brata no sista we i harem se hem i stap traehad hem wan nomo. Mifala i no save hu bambae i nidim help nekis taem, from wan trabol we hem i kasem. Long kolkol taem we aes i kavremap ol rod, wan sista i sik, ale ol yangfala brata we oli strong, oli pulum hem long wan kat i kam long ol miting.

“Mifala evriwan i stap joen long wok blong prij, mo Jeova i stap blesem fasin traehad blong mifala. Hem i luk se mifala i kasem hadtaem long Bosnia, be hem i blesem mifala taem hem i mekem namba blong mifala i kam antap​—bifo long faet, namba ya i neva kam bigwan olsem.”

Long sam narafala ples tu, long kantri ya we bifo oli kolem Yugoslavia, we i gat faet i stap gohed, namba blong ol Wetnes blong Jeova i kam antap bigwan nating se oli kasem bigfala hadtaem. Ofis blong ol Wetnes blong Jeova long Kroasia, i sanem ripot ya long saed blong wan grup blong ol Wetnes: “Ol brata we oli stap long Velika Kladuša oli kasem hadtaem we i strong tumas long olgeta. Plante taem ol ami oli kam faet agensem taon ya. Ol brata oli mas talemaot klia long ol ami blong Kroesia, Sebia, mo ol Muslim, se oli no joen nating long ol faet. Yes, oli mas stanap strong tru long plante trabol​—oli go long kalabus, ol man oli wipim olgeta, oli hanggri, mo oli stap long denja blong ded. Be nating, olgeta evriwan oli stanap strong mo oli gat nambawan jans blong luk blesing blong Jeova long ol wok blong olgeta.”

Nating se ol Wetnes blong Jeova oli kasem ol hadtaem ya long Velika Kladuša mo taon ya we i stap kolosap, Biak, be oli gohed blong kasem bigfala glad from we namba blong olgeta i stap kam antap bigwan, taem oli wok strong blong serem mesej blong God we i mekem man i haremgud, wetem ol man raonabaot long olgeta. !Long tufala ples ya, i gat 26 pablisa blong Kingdom we oli stap mekem 39 Baebol stadi!

[Futnot]