?Bambae Hu i Go Talemaot Gud Nyus?

LONG wan miting blong Wol Kaonsel blong ol Jyos 40 yia bifo, oli talem long ol memba blong ol jyos se “oli mas girap mo go talemaot gud nyus,” mo oli mas tijim ol sipsip blong olgeta blong “go talemaot gud nyus.” Faef yia biaen, wan pris blong Katolik, John A. O’Brien i raet blong tokbaot nid blong pulum ol nyufala disaepol oli kam. Hem i se, “yumi mas go long olgeta,” i no se “yumi sidaon nomo long haos blong yumi.” Mo long Janewari 1994, Pop Jon Pol 2 i talem se naoia i “no taem blong sem blong talemaot Gospel. Hem i taem blong talemaot wetem bigfala voes.”

I klia se ol tok ya we oli talem wanwan taem blong singaot ol man blong talemaot gud nyus, i kasem ol sora we oli fas. Nyuspepa ya blong Ostrelya Illawarra Mercury, i talem se: “Ol strongfala Katolik long Saot Kos oli no wantem tekem fasin ya blong ol Wetnes blong Jeova blong go talemaot bilif blong olgeta.” Wan man i talem se i “no fasin blong ol Katolik” blong go talemaot gud nyus. Wan narafala man i talem se: “I gud we Jyos i leftemap hem wan long fored blong ol man, be i no tru long fasin blong go kilkilim doa blong ol haos. Tru long tijing long ol skul blong pikinini no tru long ol leta, maet hemia nao rod we i moagud.” Lida blong wan katedral long ples ya, hem tu i no klia long mining blong tok blong pop. Hem i talem se: “Yumi save leftemap tingting blong ol man blong folem Gospel we oli save long hem, long prapa laef blong olgeta. Mi no save sipos samting ya i minim se oli mas go kilkilim doa blong haos blong ol man.” Nem blong store ya i eksplenem gud bisnes ya, i se: “Ol Katolik oli no wantem obei long Pop we i singaot olgeta blong prij.”

Nating se ol man blong Krisendoma oli no wantem go talemaot gud nyus, bitim faef milyan Wetnes blong Jeova oli stap folem oda blong Jisas, blong ‘go long ol man long olgeta ples long wol, mo pulum olgeta oli kam ol man blong Kraes.’ (Matyu 28:19, 20; skelem wetem Ol Wok 5:​42.) Naoia, oli stap mekem wok ya blong prij long ol haos wanwan long bitim 230 kantri. Mesej we oli stap talemaot i gud we i gud. Hem i long saed blong nambawan promes blong Baebol long fyuja. I gud yu storeyan wetem olgeta long nekis taem we oli kam visitim yu.

[Futnot]