Olsem Wanem Hat We i Kwaet i Save Givhan Long Yu

OL DOKTA oli save longtaem finis se fasin kros i save spolem bodi blong man. Bitim wan handred yia bifo, The Journal of the American Medical Association (JAMA) i talem se: “Tingbaot, sipos wan man we i faerap bigwan long kros i foldaon ded. Maet ol narafala oli talem se, hat blong hem i no strong, ale hem i no save karem ol wari blong hem. I luk olsem se i no gat wan man we i ting se trabol ya i kamaot from we longtaem finis i kam, man ya i stap faerap bigwan long kros, mo samting ya nao i mekem se hat blong hem i no strong.”

Olgeta we oli stadi long Tok blong God, Baebol, oli no sapraes long tok ya antap. Tu taosen naen handred yia bifo we JAMA i talemaot denja blong fasin kros, tabu speret i pusum King Solomon blong raetem se: “Hat blong man we i kwaet, hem i givim laef long bodi blong hem.” (Proveb 14:30) Ol tok ya oli tru yet tede.

Taem yumi holem kwaet fasin, yumi no kasem ol sik we plante taem oli kamaot from wari: hae blad presa, hed i soa, mo ol problem blong pulum win. Yumi save gat gudfala helt. Be antap long hemia, fasin fren blong yumi wetem ol narafala bambae i kamgud moa, sipos yumi traehad blong ‘no kam kros mo faerap.’ (Ol Sam 37:8) Oltaem ol man oli wantem stap kolosap long Jisas from we hem i wan kwaet man, mo hem i givhan long olgeta wetem fulhat blong hem. (Mak 6:​31-​34) I sem mak, yumi tu yumi save mekem ol narafala oli haremgud sipos yumi mekem hat blong yumi i stap kwaet.​—Matyu 11:28-​30.