?Hu i Gat Fol From Ol Faet?
?I STRET blong talem se God nao i stampa blong ol faet blong man? “No gat, God i no wantem ol faet.” Hemia wanem we Martin Niemöller, wan pasta blong Protestan skul long Jemani we plante man oli savegud hem, i talem blong ansarem kwestin ya, smoltaem afta we Seken Bigfala Faet Blong Wol i finis. Ol tok blong hem oli kamaot long wan buk we oli wokem long 1946, nem blong hem, Ach Gott vom Himmel sieh darein—Sechs Predigten (O God Long Heven, Lukluk i Kamdaon—Sikis Bigfala Toktok).a Buk ya i talem se:
“Man we i talem se God nao i stampa blong ol [faet] hem i no save, no i no wantem save, Tok blong God. Be, samting we i defren olgeta hemia kwestin ya se, ?yumi ol Kristin i gat fol from ol faet ya we oli stap gogohed, no nogat? Mo yumi no save ronwe long kwestin ya isi nomo. . . . Mo tu, yumi save rimemba gud se long olgeta handred yia we oli pas, plante taem ol Kristin jyos oli askem blesing long ol faet, ol ami, mo ol tul blong faet. Mo tu, oli mekem fasin we i no Kristin nating, taem oli prea blong bambae ol enemi blong olgeta oli lus long faet. Olgeta samting ya i fol blong yumi mo i fol blong ol papa blong yumi. Be yumi no save talem se hemia fol blong God, no gat. Yumi ol Kristin blong tede, yumi stap sem bigwan taem yumi skelem yumi wetem smol grup blong man we oli kolem ol Baebol Studen we oli Wokhad [ol Wetnes blong Jeova]. Plante handred mo taosen blong olgeta ya oli bin stap long ol rabis kalabus mo oli ded [tu], from we oli no wantem joen long ol faet, mo oli no wantem sutum narafala man i ded.”
Tede, samwe 50 yia afta long Seken Bigfala Faet Blong Wol, ol tok ya blong Niemöller oli mekem ol man we oli laekem pis oli tingting dip. !Yes, yumi no save talem se i fol blong God we fulap blad i ron long olgeta nesen! Defren olgeta, God i yusum ol man we oli wosip long hem long trufala fasin, we oli no joen nating long ol faet blong wol ya, blong talemaot se i no longtaem, bambae ol faet oli finis olgeta.—Ol Sam 46:9; Jon 17:16.
[Futnot]
a Biaen, ol bigfala tok ya blong Martin Niemöller oli kamaot long Engglis tu, long buk ya Of Guilt and Hope. Be, ol Engglis tok ya oli defren long prapa tok blong hem long lanwis blong Jemani. Taswe, mifala i tanem haf ya i kam stret long lanwis Jemani.
[Foto Credit Line long pej 32]
USAF photo