Ol Wetnes Blong Jeova Long Gris Oli Win Bakegen Long Kot
LONG Oktoba 6, 1995, tu fultaem paenia oli pas long wan Kot blong Atens we i gat tri jaj blong hem. Tufala Wetnes ya oli bin go long haos blong wan polisman, ale hem i putum tufala long kot from we hem i talem se tufala i traem pulum hem blong jenisim skul blong hem.
Woman we hem i bigfala jaj, i askem ol kwestin we oli soem se hem i intres tumas long wok blong ol Wetnes blong Jeova. Eksampel, hem i askem se: “?Yutufala i bin mekem wok ya blong hamas yia? ?Ol man oli bin mekem wanem fasin long yutufala long ol yia ya? ?Wok blong yutufala i bin karem wanem frut? ?Yutufala i talem wanem long ol man taem yutufala i go long haos blong olgeta?” Olgeta we oli stap long kot oli lesingud long gudfala wetnes we tufala ya i givim.
Tufala Wetnes ya oli sapraes tumas from we loea we i agensem tufala, hem tu i talem ol gudfala tok long saed blong ol Wetnes. Hem i talem long laswan tok blong hem se: “Konstitusen i givim raet long ol Wetnes blong Jeova blong bilif long God blong olgeta mo blong wosipim hem. Mo tu, oli gat raet blong talemaot bilif blong olgeta long ol haos wanwan, long ol pablik ples, long rod, mo sipos oli wantem, oli save givimaot ol buk blong olgeta we oli no askem ol man blong pem.” Loea ya i talemaot disisen we sam narafala kot mo Kaonsel blong Stet i bin mekem, blong no jajem ol Wetnes from ol wok olsem. Mo tu, hem i tokbaot wan bisnes we i pas long kot, hemia Kokkinakis agensem Gris. Long bisnes ya, Kot blong Yurop long saed blong Raet blong Ol Man i mekem disisen we i agri wetem wok blong ol Wetnes blong Jeova.a Loea ya i givim wan woning se: “Plis makemgud se, gavman blong Gris i bin pem wan faen taem ol Wetnes oli win long bisnes ya. Taswe, yumi mas lukaotgud taem yumi jajem wan bisnes olsemia. Antap moa, i no stret nating we oli putum ol bisnes olsem long han blong kot.”
Taem loea we i agensem tufala Wetnes i finisim toktok blong hem, loea we i stanap long saed blong ol Wetnes i no nidim blong talem plante samting bakegen. Be, hem i tekem jans blong tokbaot loa ya we i agensem fasin blong traem pulum narafala blong jenisim skul blong hem. Hem i talem se loa ya i no stret wetem konstitusen, mo se hem i mekem Gris i sem long fored blong ful wol.
Bigfala jaj i jes lukluk nomo long tufala narafala jaj, nao oli agri evriwan se Wetnes man mo woman ya, tufala i mas gofri. I tekem wan haoa mo ten menet blong mekem kot. Nem blong Jeova mo ol man blong Hem oli win.
Afta we Kot blong Yurop long saed blong Raet blong Ol Man i harem bisnes blong Kokkinakis, hemia namba fo disisen we kot i mekem blong letem ol man oli gofri, taem oli pas long kot from we oli bin traem blong pulum ol narafala blong jenisim skul blong olgeta. Ol Wetnes blong Jeova long Gris oli glad tumas se kolosap i no moa gat problem long saed blong wok blong prij, mo se oli save gohedgud long wok ya we i no gat samting blong blokem olgeta.
[Futnot]