Trutok Long Saed Blong Hel

RIPOT blong wan grup blong ol haeman blong Jyos blong Engglan we oli luklukgud long ol tijing blong jyos, i talem se hel i no wan ples blong faea nating. Hem i no wan trufala ples, be hem i jes wan ples we i nating nomo. Ripot ya i eksplenem se: “I gat plante risen from wanem i gud blong jenisim tingting ya. Wan long olgeta se, ol man we oli Kristin wetem ol man we oli no Kristin tu, oli tok agensem eni skul we i mekem man i fraet. Mo tu, ol man oli stap luksave moa se bilif long wan God we i sanem plante milyan man oli go long wan ples we oli harem nogud blong olwe, i agensem lav we God i soemaot tru long Jisas Kraes.”

I no Jyos blong Engglan nomo we oli gat tingting ya we i no moa agri wetem bilif we i stap longtaem finis long saed blong hel. Plante man blong ol defren skul oli faenem i had blong wosip long wan God we i bonem ol man long faea, blong givimbak long olgeta from sin blong olgeta. Jackson Carroll, wan tija long saed blong ol jyos mo ol grup blong man, long Diviniti Skul blong Dyuk Yunivesiti, i talem se: “Ol man oli wantem wan God we i gat kaengud fasin mo i holemtaet olgeta wetem lav. Taem yumi tokbaot sin mo fasin sem, samting ya i agensem tingting blong ol man long taem blong yumi.”

Longtaem finis, ol Wetnes blong Jeova oli bilif olsem Baebol i tijim, se hel i beregraon blong ol dedman nomo. Hem i no wan ples blong faea we man i save harem nogud long hem. Oli no bilif olsem from we plante man oli agri long bilif ya, be from we Baebol i talem se: “Ol dedman oli no save wan samting nating . . . I no gat wok no plan no save no waes long Seol [“hel,” Katolik Douay Version].”​—Eklesiastis 9:​5, 10.

Wetem klia save ya long saed blong ol dedman, long 1896, Charles Taze Russell, faswan presiden blong Watch Tower Sosaeti, i raetem se: “Mifala i no faenem wan tok [long Baebol] we i tokbaot wan ples blong mekem man i harem nogud blong olwe, olsem ol buk blong jyos, ol him buk, mo plante lida blong skul, oli tijim. Be mifala i luk se Baebol i tokbaot wan ‘hel,’ seol, hades, we evriman i mas go long hem from we oli kasem sin blong Adam. Mo tu, ded blong Masta blong yumi i save tekemaot yumi long ples ya. Mo ‘hel’ ya, hem i beregraon blong man​—ples we ol dedman oli stap long hem.”

Taswe, blong bitim wan handred yia nao, ol Wetnes blong Jeova oli bin tijim trutok blong Baebol long saed blong hel.

[Foto long pej 32]

Charles T. Russell