Stretem Ol Gyaman Toktok Long Franis
I NO longtaem i pas, ol man oli talem tumas gyaman toktok agens long ol Wetnes blong Jeova long Franis. Taem nyus i stap tokbaot ol trabol long Yurop mo Japan long saed blong ol krangke skul we oli folem wan man nomo, oli givim rong save long ol man long saed blong ol Wetnes blong Jeova. Oli givim gyaman tingting ya se ol Wetnes blong Jeova oli wan krangke grup we i bigwan olgeta mo i denja tumas.
Ol Wetnes blong Jeova oli traehad blong stretem bisnes ya. Ale, oli prentem wan pepa we i givim ansa long ol kwestin olsem: ?Hu ya ol Wetnes blong Jeova? ?Oli ol Kristin? ?Oli go luk dokta mo pas long hospital? ?From wanem oli stap go long ol haos wanwan? ?Olsem wanem oli kasem mane blong sapotem wok blong olgeta? ?Olsem wanem ol Wetnes blong Jeova oli givhan long velej?
Pepa ya we i givim plante save, hem i long Franis lanwis. Nem blong hem Ol Wetnes Blong Jeova—Ol Samting We Yu Mas Save. Blong givimaot pepa ya long plante man, ol Wetnes oli mekem wan bigfala wok. Stat long Mei 13 kasem Jun 9, 1996, oli seremaot moa long naen milyan kopi blong pepa ya.
Pepa ya i pulum tingting blong plante man. Sam long ol man ya, hemia ol haeman blong gavman. Afta we wan bigfala man blong kaonsel long wan ples i ridim pepa ya, hem i raetem se: “Ol toktok agensem ol Wetnes blong Jeova i mekem mi mi kros tumas. Plante taem, mi luksave olsem wanem yufala i wok wetem fasin blong tingbaot ol narafala fastaem mo blong mekem i gud long ol narafala.” Wan memba blong Palemen blong Yurop i raet blong talemaot tingting blong hem afta we hem i ridim pepa ya. Hem i se: “Bighaf blong ol man oli savegud olsem wanem grup blong ol Kristin we yufala i blong hem, i defren long ol krangke grup we oli folem wan man.”
Long Britani, wan Wetnes i givim pepa ya long wan pris. Pris ya i glad blong karem. Hem i talem se: “Mi mi presem yufala from samting we yufala i stap mekem.” Biaen hem i ademap se: “Mi talem long ol man blong jyos blong mi se, oli mas tekem yufala i go insaed long haos blong olgeta mo givim wan kap kofe long yufala. Yu save talem long olgeta we yu faenem olgeta, se yu bin kam long haos blong mi. Mi wantem talem long yu tu se mi mi glad blong ridim ol buk blong yufala.”
Afta we wan man Protestan long Alsas i kasem wan pepa, hem i raet long Watch Tower Sosaeti blong askem wan Baebol stadi. Hem i raetem se: “Mi no moa trastem skul blong mi nating. Mi wantem stat bakegen long saed blong speret.” Nating se plante man oli talem ol gyaman toktok agensem ol Wetnes blong Jeova, be long Franis—yes, long olgeta ples long wol—ol Wetnes oli stap gohed blong givhan long ol man, blong oli kasem stret save long saed blong ol stampa tingting blong God, we oli stap insaed long Baebol.—2 Timote 3:16, 17.