Wan Mared We i Gat 403 Yia i Kasem Trabol
LONG Swiden, Jyos mo Gavman oli joengud blong bitim 400 yia finis. Naoia, mared ya bitwin skul mo gavman i no moa stanap strong.
Long 1593, Luteran i kam olsem stampa jyos we Gavman i agri long hem long kantri ya, mo olgeta man Swiden oli mas baptaes long hem. Sam yia biaen, long ol yia 1850, oli mekem wan jenis. Ol man Swiden oli no moa nidim blong tekem baptaes. Nating se i olsem, oli save stap olsem ol memba blong Luteran Jyos. Ol memba ya oli mas givim wan pesen blong ol mane we oli kasem long wan yia, blong sapotem jyos mo blong pem jyos from sam wok we hem i mekem long ol man. I no longtaem i pas, wan narafala jenis i kamaot. Stat long 1952, ol man Swiden oli save mekem wan pepa folem loa blong aot long jyos. Olsem nao, oli no moa pem bighaf blong takis blong jyos.
Long ol yia we oli jes pas, Luteran Jyos i stap lusum paoa blong hem long Swiden. Oli no save blokem samting ya, from we 10 pesen blong ol man we oli stap long Swiden oli kam long ol narafala kantri. Olgeta ya oli no Luteran, be oli ol man Jyu, Katolik mo Muslim. Taswe, long stat blong 1996, 86 pesen blong ol man Swiden nomo oli stap long Luteran Jyos, mo namba ya i stap godaon.
Plante man oli no moa intres long skul. Taswe, Jyos mo Gavman tufala i stap seraot. Oli talem finis se king i no nidim blong go long jyos blong ol Luteran, mo ol pikinini we papa mo mama blong olgeta i Luteran, oli no moa memba blong Luteran Gavman Jyos taem oli bon. Mo tu, folem The Dallas Morning News, long yia 2000, “ol lokol jyos mo gavman oli mas save praes blong ol graon blong jyos mo seraotem mane ya. Jyos i mas katemdaon 1.68 bilyan dola we hem i stap kasem evri yia. Oli kasem bighaf blong ol mane ya from takis we ol man oli pem.” Afta long yia 2000, bambae jyos nomo i putumap ol prapa bisop blong hem.
Ol jyos long Krisendoma oli stap lusum ol memba blong olgeta, mo ol man blong ol jyos ya oli no moa kea long saed blong skul. Be ol Wetnes blong Jeova long Swiden oli stap gohedgud. Buk ya 1997 Yearbook of Jehovah’s Witnesses i talem se, i gat 24,487 man blong talemaot Kingdom blong God long kantri ya, mo kolosap 10 pesen blong olgeta oli mekem wok blong prij olsem ol fultaem paenia. Plante blong olgeta ya, oli stap traehad blong kasem moa jans blong wok. Eksampel, long ol distrik asembli blong ol Wetnes blong Jeova long 1995, 20 man wetem woman blong olgeta oli fulumap pepa blong askem sipos oli save kasem trening long Wajtaoa Baebol Skul blong Gilead. Long taem ya, i gat samwe long 75 man Swiden we oli mekem trening long Gilead finis, mo we oli stap wok olsem misinari long ol defdefren ples blong wol. I klia se gudfala eksampel blong olgeta mo ol leta mo visit blong olgeta, i leftemap tingting blong olgeta long Swiden we oli wantem kasem bigfala blesing ya tu.
Taswe, taem ol milyan man long Krisendom oli stap harem nogud, ol Wetnes blong Jeova oli “singaot bigwan from we oli haremgud long hat blong olgeta.”—Aesea 65:13, 14.
[Futnot]
a Ol skul we oli gyaman se oli Kristin.
[Map blong pija long pej 30]
(Lukluk niuspepa)
Swiden