Karem Yok Blong Yu Taem Yu Yangfala

Long taem ya we ‘laef long wol ya i kam strong tumas,’ ol yangfala oli fesem plante hadtaem. (2 Timote 3:1) Evri dei nomo, oli kasem ol traem we oli pulum olgeta blong mekem nogud fasin long saed blong seks, smok, mo ol narafala fasin we oli spolem gudfala fasin blong olgeta. Ol yangfala we oli folem ol rul blong Baebol, maet oli faenem se ol narafala oli jikim olgeta, from we oli no joen wetem olgeta. From samting ya, maet samfala Kristin oli harem se i isi moa sipos oli kam slak nomo mo folem fasin blong ol narafala yangfala.

Kolosap long yia 600 B.K.T.,a Jeremaea i raetem se: “I gud long wan man sipos hem i karem yok blong hem taem hem i yangfala.” (Lamentesin 3:​27) ?Hem i minim wanem? Hemia se, sipos yu lan blong winim ol traem taem yu yu yang yet, samting ya bambae i halpem yu blong fesem ol narafala problem we bambae yu kasem taem yu bigwan. I tru se, ol Kristin yangfala mo bigman tu oli no save ronwe long ol trabol. (2 Timote 3:​12) Be ol blesing we yumi kasem taem yumi stanap strong long bilif, oli moagud i bitim fasin blong haremgud blong smoltaem we yumi save kasem taem yumi lego stret fasin.

Sipos yu yu wan yangfala, fesem mo winim olgeta samting we oli traem bilif blong yu. Taem samting i pulum yu blong folem fasin we i nogud, yu no mas letem yu blong folem fasin ya. I tru se naoia bambae yu faenem se i no isi blong mekem samting ya. Be biaen, bambae yu luk we yu no gat plante wari. Jisas i promes se: “Yufala i mas putum yok blong mi long solda blong yufala, . . . , nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.”​—Matyu 11:29, 30.

Yu mas luksave se taem yu laef folem ol rul blong Baebol, bambae yu kasem ol traem. Be taem yu gohed blong folem ol rul ya mo winim ol traem, yu yu stap folem beswan rod blong laef naoia, mo bambae yu gat wan hop we i sua long fyuja. Olsem Baebol i talem, “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.”​—1 Jon 2:​17.

[Futnot]