Wan Laet Blong Lidim Yu Long Rod Blong Laef

“O JEOVA, mi mi savegud we man blong graon i no masta blong rod blong hem. Man i no naf blong jusum wanem rod hem i mas wokbaot long hem.” (Jeremaea 10:23) Ol tok ya blong profet Jeremaea i soem se ol man oli nidim help blong wokbaot long rod blong laef. ?Weples oli save faenem help ya? Man blong raetem Ol Sam i givim ansa long prea we hem i mekem i go long Jeova God, i se: “Tok blong yu hem i laet we i stap lidim mi, hem i laet blong rod blong mi.”​—Ol Sam 119:105.

Olgeta we oli stadi long Tok blong God, Tabu Baebol, mo folem wanem we Baebol i talem, oli olsem man we i aot eli long moning blong mekem wan trep. Fastaem, hem i no save luk plante samting from we ples i tudak. Be taem san i stat kam antap, hem i luk ol samting i klia moa. Biaen, san i stap stret antap. Nao hem i lukluk evri samting i klia nomo. Pijatok ya i mekem yumi tingbaot wan proveb blong Baebol we i talem se: “Rod blong ol stret man i olsem laet we i saen mo i saen moa gud gogo kasem we delaet i kamaot.”​—Proveb 4:​18.

?Olsem wanem long olgeta we oli no wantem se God i lidim olgeta? Baebol i talem se: “Rod blong ol man nogud i olsem tudak. Oli no luksave samting we oli foldaon long hem.” (Proveb 4:​19) Yes, ol man nogud oli olsem man we i foldaon long tudak. Taem i luk olsem se bambae oli win, hemia i blong smoltaem nomo, from we “i no gat waes, fasin luksave, mo advaes we i save stanap agens long Jeova.”​—Proveb 21:30.

Taswe yu mas letem Tok blong God, Baebol, i lidim yu. Sipos yu mekem olsem, bambae yu faenem we ol tok blong Proveb 3:​5, 6 oli tru. Hem i se: “Yu mas trastem Jeova long ful hat blong yu. Yu no mas stanap long prapa waes blong yu nomo. Long olgeta samting we yu yu mekem, lesin long hem, mo hem bambae i mekem ol rod blong yu oli stret.”