Soem Lav Long Olgeta We Oli Gat Nid

SOEM lav long ol Kristin brata mo sista we oli gat nid i wan samting we ol Kristin oli mas mekem, mo hemia wan blesing tu. (1 Jon 3:​17, 18) Aposol Pol i raetem se: “Yumi mas mekem i gud long olgeta man. Antap moa, yumi mas mekem olsem long olgeta ya we oli bilif long Kraes, nao oli brata blong yumi.” (Galesia 6:​10) I no longtaem i pas, wan Kristin we i mekem wok blong Jeova blong kolosap 40 yia finis, i luk olsem wanem kampani blong ol Kristin brata oli soemaot lav, taem waef blong hem i sik mo biaen i ded. Hem i raetem se:

“Mi stap lukaot long waef blong mi long haos blong mitufala taem hem i sik, ale mi no save wok blong kolosap tu manis. !Mi mi haremgud tumas taem ol fren long kongregesena oli kam, mo oli glad blong halpem mitufala! Oli givim plante mane long mitufala olsem presen, mo oli raetem ol smol kad we oli talem se: ‘Mane ya i blong pem sam samting we yutufala i nidim.’ Mane ya i pem ren, lektrik, wora, mo sam narafala samting.

“Tu wik bifo we waef blong mi i ded, seket elda i kam blong leftemap tingting blong mitufala. Mo tu, hem i soem long mitufala ol slaed foto we kongregesen bambae i luk long en blong wik ya. Mitufala i lesin long ol miting wetem wan telefon we oli joenem long wan laodspika long Haos Kingdom. Mitufala i lesin tu long ol miting blong prij we seket elda i lidim. Long wan miting olsem ya, hem i askem grup we i stap, blong talem ‘halo’ long waef blong mi, evriwan wantaem. Ale, nating se waef blong mi i stap long wan ples we i no save luk plante man, hem i neva filim se hem i stap hem wan nomo.

“Wan haoa nomo afta we waef blong mi i ded, kolosap olgeta elda blong kongregesen oli stap long haos blong mi. Moa long wan handred brata mo sista oli kam long dei ya. Kakae i stap rere long tebel kwiktaem nomo olsem wan merikel, ale, olgeta evriwan we oli stap oli kakae. Mi no save kaontem long tingting blong mi olgeta presen, olgeta tok blong talem sore, olgeta wod blong leftemap tingting, mo ol prea we ol narafala oli bin talem blong halpem mi. Help blong olgeta i mekem se mi mi kam strong bakegen. !Biaen, mi talem long ol brata se oli no moa nidim blong halpem mi long saed blong kakae mo wok long haos!

“?Sipos i no gat ogenaesesen blong Jeova, yumi save faenem wanem narafala grup we oli soemaot sore, intres, mo lav olsemia, from we oli no tingbaot olgeta fastaem? Plante man tede oli save kaontem long wan han nomo hamas trufala fren oli gat. !Jeova i rili blesem yumi taem i givim wan bigfala famle blong ol Kristin brata mo sista long yumi!”​—Mak 10:29, 30.

[Futnot]