Gudfala Samting i Kamaot From Fasin Blong No Slipgud Long Naet
NATING se wan man i king, i save gat sam naet we hem i no slipgud. Afta long yia 500 B.K.T., Ahasuerus, wan strongfala king blong Pesia, i bin gat trabol ya wan naet. Ating hem i ting se hem i fogetem blong mekem wan wok, ale, hem i askem man blong wok blong hem blong ridim buk blong histri blong kantri long hem. Nao hem i faenemaot se wan gudfala man blong wok blong hem, Modekae, i bin blokem wan plan blong kilim hem i ded, be i no kasem pei from. Ale, Ahasuerus i tekem disisen blong stretem samting ya kwiktaem nomo. Samting we i kamaot long ol man blong God from disisen blong hem, i soem se God nao i mekem Se king ya i no slipgud.—Esta 6:1-10.
Kongregesen blong ol Wetnes blong Jeova long Hermanas, wan taon kolosap long solwora, long Saot Afrika, i gat gud risen blong rimemba store ya blong Baebol. Bifo, oli mekem ol miting blong olgeta long wan ren haos. Long plante yia finis, oli bin traem blong pem wan graon blong bildim prapa Haos Kingdom blong olgeta. Nao, long 1991, munisipol i wantem salem wan nambawan graon long olgeta.
Be, sam man oli no wantem se munisipol i salem pis graon ya long ol Wetnes blong Jeova. Sam manis i pas, ale, munisipol i talem long kongregesen se oli tekem disisen blong wet tri yia bifo we oli salem graon long eni jyos. Taswe, oli no moa save salem pis graon ya long ol Wetnes. Long manis Mei 1993, kongregesen i raetem wan narafala leta, blong askem munisipol blong tingting bakegen long disisen ya. Be kongregesen i kasem wan smosmol leta nomo, we i talem se disisen blong munisipol i stap sem mak yet.
Wan naet, long manis Oktoba blong sem yia, wan woman long munisipol i no save slipgud. Ale, hem i ridim sam olfala pepa blong munisipol blong luk sipos oli mas lukluk bakegen long sam bisnes. Leta blong ol Wetnes we i askem munisipol blong tingting bakegen long disisen blong hem, i pulum ae blong woman ya. Taswe, hem i raetem bisnes ya i go long program blong nekis miting blong munisipol. Hem i wantem soem long munisipol se ol Wetnes blong Jeova oli askem graon ya bifo we munisipol i tekem disisen blong no moa salem graon long ol jyos.
!Sam taem biaen, oli salem semfala graon ya long kongregesen, we oli rere blong salem long olgeta long 1991! Graon ya i stap kolosap long bigfala rod, mo i isi nomo long ol brata sista blong kongregesen mo olgeta we oli intres, blong oli kam long ples ya. Oli bildim wan naesfala Haos Kingdom, we oli dediketem i go long Jeova long Oktoba 5, 1996.
I tru se, kongregesen i sore we woman blong munisipol i no slipgud wan naet, be ating woman ya i save haremgud moa sipos hem i tingbaot se King Ahasuerus tu i bin kasem trabol ya. Mo en blong tufala store ya evriwan i gud. I sua se kongregesen blong Hermanas i glad tumas blong gat prapa Haos Kingdom blong olgeta, stampa ples blong klin wosip mo blong tiokratik tijing, long taon ya kolosap long solwora we plante man oli laekem blong go long hem.—Hibrus 10:24, 25.