Ol Ten Komanmen
LONG Engglan, bisop blong Glosta i faenemaot se bitim stret haf blong ol lida blong jyos long ples blong hem oli no save talem ol Ten Komanmen, mo 10 pesen blong olgeta oli no save weples blong faenem ol Ten Komanmen long Baebol. Be samting ya i hapen 450 yia finis. ?Stat long taem ya, samting ya i kamgud moa? No gat—olsem nyuspepa ya Sunday Times i soemaot i no longtaem i pas, long wan stadi we hem i mekem long saed blong ol lida blong Anglikan.
Long 200 haeman blong Anglikan we oli askem olgeta blong talem Ten Komanmen, 34 pesen nomo oli save talem. Long ol narafala, wan i harem se ol Ten Komanmen oli blokem tumas samting, mo wan narafala i talem se oli no stret long ol problem blong tede.
?Yu yu save ol Ten Komanmen mo weples blong faenem olgeta? Oli stap long namba tu buk blong Baebol, Eksodas, japta 20, vas wan kasem seventin. I gud yu ridim olgeta. I gat wan isi rod blong seraotem olgeta long ol grup. Namba wan kasem fo oli tokbaot wosip long God, namba faef i tokbaot famle laef, namba sikis kasem naen oli tokbaot fasin we yumi mekem long ol narafala, mo namba ten i spesel, from i mekem se yumi skelem ol tingting we oli stap long hat blong yumi, mo jekemap wanem i stap pusum yumi. Hemia sam sot tok blong soem olsem wanem ol Kristin oli save folem ol rul ya.
Namba Wan: Yumi mas givim olgeta wosip i go long Man we i Wokem Yumi nomo. Namba Tu: Yumi no mas yusum ol aedol blong wosip. Namba Tri: Yumi mas soem respek mo givim ona long nem blong God. Namba Fo: Yumi mas tekem taem blong tingbaot ol samting long saed blong speret, mo no letem ol narafala tingting oli pulum yumi. Namba Faef: Ol pikinini, yufala i mas soem respek long papa mama blong yufala. Namba Sikis: Yumi no mas kilim narafala man i ded. Namba Seven: Yumi no mas slip wetem hasban no waef blong narafala. Namba Eit: Yumi no mas stil. Namba Naen: Yumi mas tok tru oltaem. Namba Ten: Yumi no mas wantem samting blong narafala man.
Ol Ten Komanmen ya oli sam long olgeta loa we Moses i kasem. Yumi save folem ol rul we oli stap insaed long ol Komanmen ya long taem blong yumi tu. (Rom 6:14; Kolosi 2:13, 14) Ol man blong Jisas oli yusum mo tokbaot ol Ten Komanmen. (Rom 13:8-10) !Sipos olgeta man oli folem mo soem respek long ol rul ya we oli kamaot long God, bambae laef i moagud mo sef!