Wan Gol Earing We i Flasemgud Yumi

STAT long taem bifo kam kasem naoia, ol man oli tinghae long ol gol jen mo earing, from we oli sas mo oli naes. Afta we Josef i kam praem minista long Ijip, Fero i givim wan gol jen long hem. (Jenesis 41:42) Rebeka tu i kasem wan presen, hemia wan gol ring blong werem long nus blong hem, mo wan gol jen blong werem long han blong hem. Praes blong olgeta tede i samwe long 140,000 vatu. (Jenesis 24:22) I sua se man mo woman ya i gat bigfala tangkyu from ol nambawan presen ya, mo tufala i glad blong werem olgeta.

Baebol i tokbaot ol sas samting blong flasem bodi, olsem wan pijatok blong samting we i sas moa i bitim ol gol jen mo ring we Josef mo Rebeka i werem. Proveb 25:12 i talem se: “Man we i stretem narafala long waes fasin, i olsem wan gol earing no wan naesfala samting we oli wokem long spesel gol, long tingting blong hemia we i harem tok blong hem.” Taem wan man i givim advaes we i stanap long Tok blong God i bitim we i kamaot long tingting blong hem nomo, i olsem we hem i givim wan nambawan presen. ?From wanem? From we advaes ya i rili kamaot long Jeova hem wan. Baebol i talem se: “Pikinini blong mi, yu no mas sakemaot fasin stretem blong Jeova. Mo taem hem i tok blong stretem yu, yu no mas tingting nogud long ol tok ya blong hem, from we Jeova i stretem man we hem i laekem, olsem wan papa i mekem long pikinini we i glad long hem.” (Proveb 3:​11, 12) Taem man i lesin long tok we i stretem hem mo i folem advaes ya wetem tingting daon, i olsem we hem i stap flasem bodi blong hem wetem wan earing we oli wokem long gol. Wan proveb we God i pusum man blong raetem long Baebol, i talem se: “Man we i faenem waes hem i hapi, mo man we i kasem fasin luksave, hem tu i hapi. From we i moa gud wan man i winim samting ya, i bitim we hem i winim selva. Mo i moa gud wan man i gat fasin ya, i bitim we hem i gat gol.”​—Proveb 3:​13, 14.