‘Pulum Ol Man Blong Olgeta Kantri Oli Kam Man Blong Mi’
‘FROM samting ya, yufala i mas go long ol man long olgeta kantri blong wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu speret.’ Hemia nao rod we New World Translation i yusum blong talem oda blong Jisas long Matyu 28:19. Be plante man oli tok agensem fasin ya blong tanem vas ya. Eksampel, wan nyuspepa blong jyos i talem se: “Long Grik lanwis, i gat wan mining nomo blong vas ya, hemia se: ‘!Pulum olgeta kantri oli kam man blong mi!’” ?Samting ya i tru, no nogat?
Plante Baebol oli tanem vas ya olsem se, “Pulum olgeta kantri oli kam man blong mi.” Blong tanem vas ya, oli yusum stret mining blong ol wanwan Grik tok. Ale, ?from wanem New World Translation i tanem vas ya se, ‘Go long ol man long olgeta kantri blong wol, blong pulum olgeta oli kam man blong mi, mo baptaesem olgeta’? Hemia from ol tok we i stap long ol vas raonabaot. I klia se tok ya “baptaesem olgeta” i tokbaot ol man, i no ol kantri. Hans Bruns, wan man Jemani we i stadi dip long bisnes ya, i talem se: “[Tok] ya ‘olgeta’ i no minim olgeta kantri (Grik lanwis i soemaot klia samting ya), be i minim ol man blong ol kantri ya.”
Mo tu, yumi mas tingbaot fasin we ol man oli folem blong obei long oda ya blong Jisas. Long saed blong wok blong prij we Pol mo Banabas i mekem long Debe, wan taon blong Esia Maena, yumi ridim se: “Pol mo Banabas, tufala i talemaot gud nyus long taon ya, mo tufala i pulum plante man oli kam man blong Jisas. Nao tufala i tanraon, tufala i kambak long Listra, mo long Ikoniam, mo long Antiok.” (Ol Wok 14:21, NW) Makem se i no taon blong Debe we Pol mo Banabas oli pulum i kam man blong Jisas, be oli pulum ol man blong taon ya.
Sem mak long saed blong taem blong en. Buk blong Revelesen i talemaot se i no ol wanwan kantri we bambae oli mekem wok blong God, be ‘wan bigfala hif blong man, we oli kamaot long olgeta kantri, mo long olgeta kala, mo long olgeta laen, mo long olgeta lanwis.’ (Revelesen 7:9) Taswe, vas ya i soemaot bakegen se New World Translation i yusum nambawan fasin blong tanem ‘olgeta tok blong Baebol we oli kamaot long God.’—2 Timote 3:16.