Tok We i Pulum Man Blong Ansa

I NO longtaem i pas, wan nyuspepa blong Katolik long Briten, nem blong hem Catholic Herald, i prentem leta blong wan man long Wels. Man ya i raetem se: “Wan naet, tu Wetnes blong Jeova oli kam long haos blong mi. Taem tufala i soem sam vas long Nyutesteman, mi tekem jans blong talem se Katolik jyos nao i bin putum nem blong hem long promes ya se Nyutesteman i tru. Mi sapraes taem wan long tufala ya i agri long tok blong mi. Nao hem i se: ‘Yes, yufala i agri long Nyutesteman, be yufala i no folem. Jisas i talem se: “Yufala i mas laeklaekem yufala, olsem we mi mi laekem yufala.” Be yufala i stap kilkilim yufala i ded. Long laswan bigfala faet blong wol, ol Katolik oli kilim ol narafala Katolik i ded. Be i no gat wan Wetnes blong Jeova we i kilim wan [narafala] Wetnes i ded.’ Taem mi harem tok ya, mi agri nomo, i no gat wan narafala tok we mi save talem. ?Olsem wanem mifala, ol Katolik, i save prea blong joengud wetem ol ‘brata blong mifala long ol narafala skul,’ sipos mifala i no stap joengud long jyos blong mifala? Ating mifala i mas stretem fasin ya blong mifala fastaem.”​—Jon 15:12.

Tufala Bigfala Faet Blong Wol long laswan handred yia, tufala evriwan i stat long ol kantri blong Krisendom. Mo namba blong ol man we oli ded long tufala faet ya i kasem 50 milyan no 60 milyan. Be i tru se, ol Wetnes blong Jeova oli no joen long tufala faet ya, mo oli no joen long ol faet we oli stap gohed tede tu. ?From wanem i olsem? Bambae yu haremgud blong kasem moa save long saed blong fasin joengud mo Kristin lav, we moa long faef milyan Wetnes blong Jeova raon long wol oli gat.​—Skelem wetem Aesea 2:4.

[Foto Credit Line Pija Long Pej 32]

U.S. National Archives photo