?Bambae God i Spolem Wol Ya?
POP Jon Pol 2 i talem se ol man oli save putum tingting blong olgeta i stap strong long wan gudfala fyuja. Hem i gohed se, long ol yia we oli pas, “ol man oli mekem plante sin, we maet oli moa nogud i bitim ol sin blong ol man bifo we bigfala wora i ron long taem blong Noa.” Nating se i olsem, folem tok blong pop, “promes we God i mekem long Noa, i soem se i no gat wan sin we i save pulum Hem blong spolem wol ya we Hem i bin wokem.”
?I tru se bambae God i neva spolem wol ya? Folem tok blong Baebol, afta we Bigfala Wora i ron, God i talem long Noa se: “Bambae mi mi no moa save sanem bigfala wora i kambak bakegen olsem blong draonem yufala, blong kilim yufala i ded. Neva bambae bigfala wora olsemia i spolem wol ya bakegen.” (Jenesis 9:11) Pop i talem se, ol tok ya blong God i olsem “promes blong hem blong blokem [wol] blong i no gat samting i save spolem hem.”
Baebol i talem klia se Man we i Wokem olgeta samting, bambae i no letem wol i lus. Hem i talem se: “Graon bambae i stap we i no save finis samtaem.” (Eklesiastis 1:4) Be Bigfala Wora ya we i ron, i lanem yumi long wan samting we pop i no tokbaot.
Jisas i talem se taem hem i kambak mo i stap, bambae ol samting long wol oli ‘olsem taem blong Noa.’ Long taem ya, ol man “oli no save wan samting, kamkam we wora i ron bigfala, i tekemaot olgeta.” (Matyu 24:37-39) Aposol Pita tu i talem se God “i spolem wol ya we i stap bifo, long wora ya we i ron bigfala.” Long sem fasin, “bigfala Dei we God bambae i jajem ol man we oli no obei long hem, nao oli lus,” bambae i kasem wol blong naoia.—2 Pita 3:5-7.
?Jisas mo Pita i fogetem promes we God i mekem long Noa? !No gat! Olsem God i promes, bambae hem i no moa kavremap wol ya wetem wora blong spolem ol rabis fasin. Be, bambae hem i yusum paoa blong “King blong ol king, mo Masta blong ol masta,” Jisas Kraes. (Revelesen [Apokalips] 19:11-21) Taswe, Baebol i talem se graon bambae i no lus, be ol rabis man blong “wol ya” bambae oli lus. (Proveb 2:21, 22; Revelesen 11:18) Biaen, ‘ol stret man bambae oli tekem graon ya i blong olgeta, mo bambae oli stap long hem gogo i no save finis.’—Ol Sam 37:29.