?Hu Ya i Stampa Blong Olgeta Samting?

LONG ol yia biaen long 1800, i gat wan Franis man we i stap wokbaot olbaot blong faenem ol nyufala ples long wol, nem blong hem Henri Mouhot. Ale, hem i stap katem wan rod blong wokbaot long hem, long medel blong dak bus blong Kambodia. Nao hem i kasem wan bigfala hol long graon we i goraon long wan olfala haos prea. Kolosap wan kilomita longwe long ples we man ya i stap stanap, faef haos blong bigbigfala haos prea ya oli go antap 60 mita long skae. Hemia wan olfala haos wosip we i bigfala moa i bitim ol narafala haos wosip long wol, nem blong hem Anko Wat. Haos ya i bin stanap strong blong 700 yia finis, nating se i gat win, ren, mo san, mo ol narafala samting we oli save spolem.

Wantaem nomo, Mouhot i luksave se wan man i bin wokem haos ya we naoia gras i stap kavremap hem. Hem i raetem se: “Wan olfala blong bifo, we i gat gudhan olsem Michelangelo, i wokem haos ya. Hem i wan haos we i bigwan moa mo i naes moa i bitim enikaen olfala haos blong ol man Gris mo Rom we yumi bin faenem.” Nating se i no gat wan man i stap long haos ya blong plante handred yia finis, be man ya i save se i mas gat wan man we i bin mekem plan blong nambawan haos ya, mo wokemgud hem.

Yumi intres blong save, se wan waes buk we ol man oli raetem plante handred yia bifo, hem i yusum semfala tingting ya blong tokbaot wol blong yumi. Buk ya i eksplenem se i mas gat wan Man we i bin mekem plan mo wokem wol ya. Aposol Pol i raetem se: “Yes i tru, evri haos oli gat man blong wokem olgeta, be God i wokem olgeta samting we i stap.” (Hibrus 3:4) Ating samfala oli no agri long pijatok ya, oli se: “Olgeta samting we oli stap raonabaot long yumi oli wok long fasin we i defren olgeta long ol samting we man i wokem.” Be, sam man blong sayens oli no agri wetem tok agens ya. Wan tija long Lihae Yunivesiti, we i stadi long ol laef samting, nem blong hem Michael Behe, i askem se: “?Olsem wanem? ?Fasin we i stap gohed insaed long ol laef samting, i kamaot from we wan man wetem waes i wokem plan blong olgeta ya?” Hem i gohed blong talem se naoia, ol sayentis oli stap wokem ol jenis long ol laef samting, folem wan rod we oli jenisim ol jina long ol samting ya. !Yes, i stret blong talem se wan man i save mekem plan mo wokem ol laef samting mo ol samting we oli no laef, mo jenisim olgeta tu! Long saed blong ol selb we ol sayentis oli save luk wetem glas nomo, Behe i tokbaot nambawan fasin blong olgeta blong wok. Fulap smosmol samting insaed long olgeta oli wok tugeta blong mekem sel i rongud. ?Wanem tingting blong hem long bisnes ya? “Ol defren stadi ya long saed blong sel, hemia long saed blong laef we i stap long ol smosmol samting we ae blong man i no save luk, oli soemaot strong mo klia mo wetem paoa se, ‘!wan man i mekem plan mo i wokem olgeta!’ ”

Sam sayentis we oli stadi dip mo blong longtaem long saed blong skae mo wol mo paoa we i pusum ol samting blong wok, olgeta tu oli faenemaot sam samting we yumi sapraes long olgeta. Wan eksampel, oli save naoia se sipos i gat jes wan smosmol jenis nomo long ol loa we ol samting long heven mo wol oli folem, bambae i no moa save gat laef long wol.c Wan sayentis we i stadi long saed blong skae mo wol, Brandon Carter, i talem se ol nambawan samting ya blong sapraes oli kamaot from laki nomo. Be sipos yu yu luk fulap narakaen samting oli hapen, we oli sem mak nomo, no we wan i joengud wetem narawan, ?bambae yu no ting se i mas gat wan man we i stap biaen long ol samting ya?

Tru ya, i gat wan Bigfala Man we i mekem plan mo i wokem ol nambawan fasin ya we samfala oli talem se “oli kamaot from laki nomo.” ?Hu ya Bigfala Man ya? Tija Behe i talem se: “Ating i strong tumas long sayens blong makemaot hu i mekem plan mo wokem ol samting ya.” Hem i talem se i moagud we “ol waes man blong wol mo ol man blong jyos” oli traem ansa long kwestin ya. Maet yu yu harem se kwestin ya i no impoten long laef blong yu. Be, sipos yu kasem wan presen, wan stret samting we yu yu nidim, we oli kavremapgud wetem naesfala pepa, ?bambae yu wantem save se hu nao i sanem presen ya, no nogat?

I olsem we, yumi evriwan i kasem wan naesfala presen. Hem i presen blong ol nambawan samting we oli mekem se yumi save stap laef mo haremgud long laef. Presen ya hemia wol ya, wetem olgeta nambawan fasin blong hem blong sapotem laef. ?Yu no ting se i stret we yumi wantem save se hu nao i givim presen ya?

I gud tumas, se Man ya we i givim presen ya i sanem wan leta i kam wetem. “Leta” ya, hemia olfala buk ya we i fulap long waes mo we yumi lukluk sam tok blong hem finis antap​—yes, hemia Baebol. Ol fastok blong Baebol oli talem long fasin we i klia mo i isi nomo blong kasem save long hem, se hu ya i givim nambawan presen ya long yumi. Hem i se: “Bifo we bifo olgeta, God i mekem wol mo skae wetem olgeta samting we i stap long tufala.”​—Jenesis 1:1.

Long “leta” ya, Man ya we i Wokem skae mo wol i talemaot nem blong hem, i se: “Hemia tok blong trufala God ya, Jeova, Man ya we i mekem skae, . . . Hemia we i wokem wol wetem ol samting long hem, mo i mekem se ol man long wol ya oli pulum win.” (Aesea 42:5) Yes, Jeova, hemia nem blong God ya we i mekem plan blong heven mo wol mo i wokem ol man mo woman long wol ya. ?Be hu ya Jeova? ?Hem i wanem kaen god? ?Mo from wanem ol man long wol oli mas lesin long hem?

[Ol futnot]

[Tok Blong Pija Long Pej 3]

Ol man nomo oli wokem Anko Wat

[Tok Blong Pija Long Pej 4]

Taem yu kasem wan presen, ?yu yu wantem save hu ya i sanem presen ya i kam?