?From Wanem Yu No Kampani Wetem Olgeta?

NDJAUKUA ULIMBA i gat 73 yia, mo las yia hem i wokbaot kolosap 450 kilomita. Hem i tekem 16 dei blong mekem wokbaot ya.

Olfala ya i wokbaot blong joen long wan asembli blong ol Wetnes blong Jeova, we oli mekem wan taem evri yia. Asembli ya i givim bigfala glad long hem from we i givhan long hem blong kam strong moa long saed long Kristin bilif. Nao taem asembli ya i finis, olfala ya i wokbaot blong 16 dei bakegen blong gobak long ples blong hem. ?Hemia, i blong nating nomo? !No gat! Longtaem finis i kam, Ndjaukua Ulimba i mekem trep ya evri yia.

Man Afrika ya, i wan long bitim 15 milyan man long 230 kantri, we oli joen long asembli blong ol Wetnes blong Jeova las yia. I tru se, bighaf blong olgeta oli no wokbaot plante dei blong kasem ples blong asembli. Kolosap evriwan oli tekem trak, bas, tren, no plen. ?Yu yu wan long olgeta ya?

Long 1998, bambae i gat ol asembli bakegen long fulwol. Kolosap olgeta asembli ya, oli stap long ol manis we ples i hot (draetaem). Sipos bodi blong Ndjaukua Ulimba i strong, bambae hem i wokbaot longwe bakegen blong joen long asembli ya. Hem wetem plante milyan narafala man, bambae oli lesin long ol gudfala advaes we i laenap wetem laef blong olgeta, we i mekem bilif blong olgeta i strong, mo we i givim paoa long olgeta. Ol man we oli joen long asembli ya oli tingbaot se hemia wan impoten samting blong yia ya. Wetem kaengud fasin, mifala i singaot yu tu blong joen long asembli ya. Ol Wetnes blong Jeova long ples blong yu, bambae oli glad blong talem long yu wanem nao stret ples blong asembli ya we i stap kolosap long yu.