Gudfala Fasin i Pulum Ol Man Blong Talem Gudfala Toktok

WAN nyuspepa long Itali, La Gazzetta del Mezzogiorno, i presem ol Wetnes blong Jeova from wan store we oli raetem, stampa tok blong hem se “Matera​—City of Unique Cave Dwellings,” (Matera—Taon Ya We i Gat Ol Narakaen Haos Long Hol Blong Ston). Store ya i stap long Wekap! blong Julae 8, 1997, magasin ya we i kasem fulap ples blong wol long plante lanwis. Naoia, oli stap wokem Wekap! long 81 lanwis, mo oli stap seremaot bitim 19 milyan kopi blong evri Wekap! long wol. Nyuspepa ya i talem se long yia ya, Wekap! i kasem wan mak we i antap long ol narafala buk, “long saed blong ol gudfala toktok blong leftemap histri mo ol naesfala samting long taon ya [Matera].”

Nyuspepa ya i presem ol Wetnes from wan asembli blong olgeta tu, we oli mekem long Matera long 1997, stampa tok blong distrik asembli ya se, “Bilif Long Tok Blong God.” Nyuspepa ya i makem se ol Wetnes oli “pulum 4,000 man oli kam long 21 Setemb Stad, long medel blong hot taem, we i gat big san. Oli klinim, pentem, mo mekem plante narafala impoten samting blong fiksimap stad ya, antap moa, ol toelet. Oli no askem long ol narafala man blong pem samting ya, olgeta ya nomo oli pem evri samting we oli nidim blong mekem wok ya.”

Ol Wetnes blong Jeova oli traehad blong soemaot gudfala fasin long ol man we oli stap raonabaot long olgeta. (Matyu 22:37-​39) Mo tu, oli folem advaes ya blong Baebol se: “Ale, yufala i mas mekem fasin blong yufala i stret gud long fes blong olgeta, . . . Nao taem God bambae i kam blong jajem olgeta, bambae oli save leftemap nem blong God from ol gudfala wok ya blong yufala.”​—1 Pita 2:​12.