Wan “Eksampel Blong Fasin Joengud Olsem Wan Brata”
Hemia ol tok we wan woman i yusum blong tokbaot fasin blong ol Wetnes blong Jeova afta we wan memba blong famle blong hem i ded. Hem i eksplenem se:
“Mi mo famle blong mi i wantem talem tangkyu long ol Wetnes blong wan kongregesen blong ol man Itali we i stap long Fraebeg, Jemani. Long famle blong mi, i gat brata blong mi Antonio wetem waef blong hem Anna nomo we oli ol Wetnes blong Jeova. Blong longtaem, mifala i toktok smol agensem jyos blong tufala nating se mifala i respektem disisen blong tufala.
“Be naoia, mifala i mas jenisim tingting blong mifala. Ol Wetnes ya oli soemaot lav long fasin we mifala i neva tingbaot bifo, i olsem we oli brata blong mifala.
“Sore tumas, Anna i ded long wan akseden blong trak. From we mifala i stap long Itali, mifala i no naf blong sapotem brata blong mi Antonio wetem ol pikinini blong hem fulwan. Be ol Wetnes brata blong hem oli givhan long hem. Oli kampani wetem hem, oli storeyan wetem hem, bilif blong olgeta i mekem hem i haremgud, mo oli givhan long hem long saed blong bodi, tingting mo mane. Mi no save talem tangkyu long wanwan blong olgeta, taswe mi wantem talemaot tangkyu blong mi tru long buk ya. Bambae mifala i no save fogetem nambawan fasin blong olgeta blong joengud olsem wan brata nomo.”
Yumi glad blong harem ol naesfala tok blong woman ya. Hem i luksave se ol Wetnes blong Jeova oli olsem wan famle blong ol brata mo sista raonabaot long wol. (1 Pita 2:17) Oli wokem wan fasin blong laeklaekem olgeta we i strong, from we oli save se lav i “joenem olgeta samting, blong oli kam wan nomo stret.” (Kolosi 3:14) Long taem blong bigfala trabol, we i kasem yumi evriwan, ol Wetnes blong Jeova oli stap kolosap long God mo ol man blong hem.—Proveb 18:24; Eklesiastis 9:11; Jon 13:34, 35.