Wan Wok We i “Pulum Respek Blong Ol Man”

APOSOL Pita i talemaot long ol Kristin brata blong hem se: “Naoia ol man we oli no bilif long God oli stap talem se yufala i man blong brekem loa. Ale, yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao, bambae oli save leftemap nem blong God from ol gudfala wok ya blong yufala.” (1 Pita 2:​12) Long plante yia, ol Wetnes blong Jeova long Itali oli soem gudfala fasin olsemia long fes blong olgeta man. Oli folem oda blong Jisas blong ‘prij long fes blong ol man,’ taem oli mekem Kristin wok blong olgeta long open ples, fored blong olgeta man. (Matyu 10:27; Jon 18:20) I no longtaem i pas, wan loea blong Itali mo wan pris oli prentem sam tok agensem ol Wetnes blong Jeova se oli “wan krangke grup we i gyaman se i wan skul.” Oli talem se ol Wetnes oli sem mak nomo long ol “grup we oli wok long fasin haed blong trikim ol man.” Ale, ol Wetnes oli tekem disisen blong putum tufala man ya long kot from we oli sakem ol tok ya blong daonem olgeta.

Fastaem, kot i talem se loea mo pris ya oli no brekem loa. Be, long Julae 17, 1997, Hae Kot blong Venis i agensem disisen blong faswan kot, hem i jajem se tufala man ya oli gat fol. Hae Kot ya i talem se: “Long tufala atikol ya we oli prentem, i gat sam tok we oli save spolem gudnem blong olgeta we oli folem skul blong ol ‘Wetnes blong Jeova.’ I klia nomo se oli raetem tufala atikol ya blong pulum ol man blong daonem ol Wetnes.” Kot i talem se ol atikol ya “oli go bitim raet we wanwan man i gat blong givim ripot mo blong tok agens long wan samting.” Kot i mekem tufala man ya i pem wan faen, mo hem i givim oda long tufala blong pem praes blong mekem kot ya, mo blong pembak mane we ol Wetnes oli spenem long kot ya, from tufala trabol ya.

Long jajmen blong hem, Hae Kot blong Venis i raetem se: “Sipos yumi wantem blokem fasin ya blong agensem narafala from skul blong olgeta, mo ol krangke fasin blong skul, yumi mas yusumgud mo protektem ol raet we Konstitusen [blong Itali] i givim.” Jajmen ya i agri se ol Wetnes blong Jeova oli no wok long fasin haed, mo oli no gyaman taem oli talem se oli wan skul. Kot i talem se, “Fasin blong talem se ol Wetnes oli wan grup we i wok long fasin haed, i no laenap wetem samting we histri i soemaot. Skul ya i stap long plante taon finis, mo olgeta man oli savegud bigfala wok blong prij we ol Wetnes oli mekem, antap moa long ol Sande mo ol pablik holide. Mo bigfala wok ya i pulum respek blong ol man, nomata wanem tingting we sam man oli save gat long saed blong tijing we ol Wetnes oli stap talemaot.” Olsem nao, strong tingting we ol Wetnes blong Jeova long Itali oli soemaot long wok blong prij mo ol nambawan fasin blong olgeta, i givhan blong karemaot rong tingting we ol man oli gat from ol gyaman tok ya.​—Matyu 5:​14-​16; 1 Pita 2:​15.